Jinoyat ishlari bo‘yicha Yashnobod tuman sudining 4-iyundagi hukmiga muvofiq 42 yoshli bloger Murod Maxsudov 7,5 yilga ozodlikdan mahrum etildi. Bu haqda Toshkent shahar sudlari xabar berdi.
Qayd etilishicha, u Jinoyat kodeksining 168-moddasi (firibgarlik) 1-qismi va 2-qismi bo‘yicha Jinoyat-protsessual kodeksining 83-moddasi 2-qismi bilan aybsiz deb topilib, reabilitatsiya etilgan.
Murod Maxsudov Jinoyat kodeksining 139-moddasi (tuhmat) 3-qismi “a”, “g” bandlari, 165-moddasi (tovlamachilik) 2-qismi “b” bandi va 167-moddasi (o‘zlashtirish yoki rastrata yo‘li bilan talon-toroj qilish) 2-qismi “b”, “g” bandlarida nazarda tutilgan jinoyatlarni sodir etganlikda aybli deb topilib, unga 7 yil 6 oy muddatga ozodlikdan mahrum qilish jazosi tayinlangan.
Tayinlangan jazoni umumiy tartibli koloniyalarda o‘tattirilish belgilangan.
Hukmdan norozi taraflar hukm eʼlon qilingan kundan boshlab, sudlanuvchi hukm nusxasini olgan kundan boshlab 10 sutka ichida Toshkent shahar sudining jinoyat ishlari bo‘yicha sudlov hayʼatiga apellyatsiya tartibida, hukm qonuniy kuchga kirgandan so‘ng kassatsiya tartibida shikoyat qilishga va protest bildirishga haqliligi maʼlum qilingan.
Avvalroq 6,6 yil muddatga ozodlikdan mahrum etilgan bloger Otabek Sattoriy umumiy tartibli koloniyadan manzil-koloniyaga o‘tkazilgani to‘g‘risida xabar berilgandi. Shuningdek, Qashqadaryoda tovlamachilikda ayblangan bloger 5 yilga qamalgan edi.
Izoh (0)