Toshkentda jismonan baquvvat bir nechta shaxsni o‘z atrofiga to‘plab, o‘ldirish yoki zo‘rlik ishlatish bilan qo‘rqitish kabi jinoyatlarni sodir qilganlikda ayblanayotgan Saidaziz Saidaliyev va 28 nafar shaxsga nisbatan sud ishi boshlandi. Bu haqda sudda qatnashgan “Daryo” jurnalisti xabar berdi.
1987-yil Toshkent shahrida tug‘ilgan Saidaziz Saidaliyev qarzdorlik va boshqa muammolari bo‘lgan shaxslar masalasini qonunni chetlab o‘tgan holda hal qilib berishi evaziga moddiy jihatdan manfaatdor bo‘lib kelgan. Shu sabab u fuqarolarga tahdid qilib, pul mablag‘larini noqonuniy qo‘lga kiritgan.
Jinoyat ishlari bo‘yicha Yunusobod tuman sudida sud raisi Murod Mirzajonov raisligida boshlangan majlisda dastlab 29 nafar sudlanuvchining shaxsi va ahvoliga aniqlik kiritildi.
Guruhning asosiy a’zosi Saidaziz Saidaliyev Jinoyat kodeksining 165-moddasi 3-qismi “a” va “v” bandi (tovlamachilik), 168-moddasi 4-qismi “a” va “v” bandi (firibgarlik), 211-moddasi 3-qismi “a” va “b” bandi (pora berish), 242-moddasi 1-qismi (jinoiy uyushma tashkil etish), 243-moddasi (jinoiy faoliyatdan olingan daromadlarni legallashtirish), 277-moddasi 2-qismi “b” va “v” bandi (bezorilik), 277-moddasi 3-qismi “a” bandi (bezorilik) bilan ayblanmoqda.
“Saidaziz medgorodok” laqabi bilan tanilgan shaxs va uning sheriklaridan jabrlanganlar soni 30 nafardan ortiq. Ular orasida tadbirkorlar ham bor.
Oliy sud axborot xizmatining ma’lumot berishicha, dastlabki tergov organining ayblov xulosasiga ko‘ra, sudlanuvchilar — S.Saidaliyev, M.Mirxodjayev, Sh.Samiyev, A.Akramov, I.Satvaldiyev, F.Alimov, R.Bobonazarov, L.Shomurodov, N.Tulyaganov, Sh.Quvatov, G‘.O‘rinboyev, U.Mahmudov, A.Nurmatov, B.Erkinov, A.Yuldashev, S.Usmonov, D.Umirzakov, T.Abdumalikov, D.Badalov, U.Raximov, D.Xoshakov, Z.Qayumov, B.Mo‘minov, D.Yunusov, D.Sultanov, B.Samadov, X.Riskiyev, B.Rahmonov va Yo.Sotivoldiyev Jinoyat kodeksining 112-, 165-, 168-, 182-, 227-, 228-, 229-, 236-, 237-, 238-, 242-, 243-, 277- va 28,211-moddalarida nazarda tutilgan jinoyatlarni sodir etganlikda ayblanmoqda. 28 nafar sudlanuvchiga nisbatan qamoqqa olish va 1 nafariga munosib xulq-atvorda bo‘lish to‘g‘risida tilxat tarzidagi ehtiyot choralari qo‘llangan. Tasdiqlangan ayblov xulosasiga asosan mazkur jinoyat ishi doirasida 31 nafar jabrlanuvchi va 130 nafar guvoh aniqlangan.
Sudda so‘z olgan advokatlar sudlov hay’atiga iltimosnoma kiritib, sudlanuvchilarning ayni paytda saqlanayotgan joyini o‘zgartirib berishni so‘radi. Aytilishicha, sudlanuvchilar ayni paytda Toshkent shahar IIBB binosidagi vaqtincha saqlash joylarida saqlanmoqda.
Ayni paytda sudlanuvchilar saqlanayotgan joyda na yuvinishga sharoit bor, na biz advokatlar bilan ko‘risha olishyapti. Qonunlarimizga ko‘ra, advokat himoya qilayotgan insoni bilan istalgan vaqtida ko‘risha olishi kerak. Shuningdek, sudlanuvchilar ham sud davomida ham munosib shart-sharoitda saqlanishga haqli, — dedi advokatlardan biri.
Yana bir advokat ham shunday talab bilan chiqib, sudlanuvchilarni “Toshturma”ga o‘tkazishni iltimos qildi. Barcha advokatlar buni qo‘llab-quvvatlab, advokatlarning umumiy talabi sifatida qabul qilinishini so‘radi. Sudya mazkur holatni o‘rganib chiqishini bildirdi.
Sudya Mirzajonov, shuningdek, OAV vakillariga yuzlanib, sud tergovi davomida qonunga amal qilgan holda jarayonni yoritib borishlari kerakligini eslatdi. Oldindan bashorat qilmaslik, sudlanuvchilarning hali aybdor emasligini inobatga olib, aybsizlik prezumpsiyasiga amal qilinishi kerakligini bildirdi.
Eslatib o‘tamiz, 2023-yil 2-dekabr kuni Toshkent shahrida “Saidaziz medgorodok” laqabi bilan tanilgan shaxs qo‘lga olingani maʼlum bo‘ldi. U atrofiga jismonan baquvvat shaxslarni to‘plab, qarzdorlik va boshqa muammolarni qonunni chetlab o‘tgan holda hal qilib berish bilan shug‘ullangan. 3-dekabr kuni esa huquq-tartibot idoralari xodimlari “Baxti Tashkentskiy” laqabi bilan tanilgan Baxtiyor Qudratullayevni qo‘lga oldi.
Ko‘p o‘tmay Toshkent shahrida profilaktik tadbir davomida Salimboy nomi bilan tanilgan Salim Abduvaliyev ham ushlandi. 1950-yilda tug‘ilgan Abduvaliyev Salim Kirgizbayevich (248-modda 1-qismi, o‘qotar qurolni qonunga xilof ravishda saqlash) gumon qilinuvchi tarzida jalb etilgan. Mart oxirlarida unga 6 yil muddatga ozodlikdan mahrum qilish jazosi tayinlangani maʼlum bo‘ldi.
Izoh (0)