“Оилавий болалар уйларини ташкил қилган ота-оналарни ўзини ўзи банд қилган шахслар рўйхатига киритиш лозим” — сенатор

Сенат оилавий болалар уйларини ташкил қилган ота-оналарни ўз-ўзини банд қилган шахслар рўйхатига киритиш юзасидан ҳукуматга таклиф киритди.

Ялпи мажлисда сенатор Дилором Ташмуҳамедова оилавий болалар уйларини ташкил этган ота-оналарни келажакда меҳнат стажи бўйича пенсия олишлари учун ўзини ўзи банд қилган шахс сифатида рўйхатдан ўтказиш таклифини билдирди.

2022 йилнинг 1 сентябрига қадар оилавий болалар уйи юридик шахс сифатида фаолият юритган. Бунда болаларни парваришлаётган ота-оналарга иш ҳақи тўланиб, уларга меҳнат стажи ҳисобланган. Кейинчалик бу тартиб ўзгарган.

Бир фарзандни тарбиялаб, вояга етказиш қанчалик масъулиятли ва машаққатли иш эканини жуда яхши биламиз. Шу маънода мазкур таклиф ҳукумат томонидан тегишли тартибда кўриб чиқилса ва ижобий ҳал этиш чоралари кўрилса, 659 нафар болани парваришлаб, тарбиялаётган фидойи ота-оналарни қўллаб-қувватлаган ва рағбатлантирган бўлардик, — деди сенатор.

Иқтисодиёт ва молия вазирлиги масъул ходими Фаррух Зокировнинг айтишишча, 345-сонли қарор билан оилавий болалар уйининг юридик мақоми бекор қилинган.

Бунга юридик мақомга эга бўлган оилавий болалар уйида бюджетдан ажратилган маблағлар сарфланишида озроқ муаммолар кузатилган. Боиси улар нимадир сотиб олмоқчи бўлса, шартнома қилиш керак бўлган. Шунинг учун юридик мақоми бекор қилинган.

Оилавий болалар уйининг муаммоларини бартараф этишга қаратилган президент қарори Ижтимоий ҳимоя миллий агентлиги томонидан ишлаб чиқилиб, Вазирлар Маҳкамасига киритилган. Юқорида кўтарилган масаланинг ечими мазкур қарорда акс этган, — деди вазирлик масъул ходими.

Ҳозирда республикада 126 та оилавий болалар уйлари ташкил этилган бўлиб, уларда 659 нафар бола тарбияланмоқда.

Маълумот учун:

• Қашқадарё – 84 нафар (15 уйда);
• Фарғона – 60 нафар (14 уйда);
• Қорақалпоғистон – 77 нафар (14 уйда);
• Тошкент вилояти – 49 нафар (10 уйда);
• Тошкент шаҳри – 56 нафар (12 уйда);
• Бухоро – 30 нафар (6 уйда);
• Самарқанд – 43 нафар (9 уйда);
• Жиззах – 53 нафар (11 уйда);
• Хоразм – 67 нафар (10 уйда);
• Сирдарё – 46 нафар (8 уйда);
• Навоий – 47 нафар (7 уйда);
• Сурхондарё – 27 нафар (5 уйда);
• Андижон – 12 нафар (3 уйда);
• Наманган – 8 нафар (2 уйда) бола тарбияга олинган.

Маълумот учун, президентнинг 2020 йил  июндаги қарори билан ўзини ўзи банд қиладиган шахслар учун фаолият (ишлар, хизматлар) турлари рўйхати тасдиқланган.