Ўтган ойда йиллик инфляция 0,2 фоизга кўтарилган. Бунга айрим турдаги озиқ-овқат маҳсулотлари, транспорт ва ёнилғи нархлари тез ўсгани сабаб бўлган.
2025 йил февралда Ўзбекистондаги истеъмол нархлари индекси (инфляция) ойлик 0,5 фоизни, йиллик 10,1 фоизни ташкил этди.
Нархлар йил бошидан бери кетма-кет икки ой давомида 2024 йилнинг мос давридагига қараганда юқорироқ ўсди. Таққослаш учун, ўтган йилнинг февралида мамлакатда ойлик 0,3 фоиз, йиллик 8,3 фоиз инфляция кузатилган.
Февралда озиқ-овқат маҳсулотлари нархи январдагидан 0,6 фоизга, ноозиқ-овқатлар 0,3 фоизга, хизматлар 0,8 фоизга қимматлашган.
Ўтган ойда қуйидаги доимий истеъмолдаги озиқ-овқатлар нархлари инфляциядан юқори даражада ошган:
- Помидор — 30,1 фоиз;
- Бодринг — 17,3 фоиз;
- Мол гўшти — 2,8 фоиз;
- Қўй гўшти — 2,4 фоиз;
- Сабзи — 2,4 фоиз.
Бир ой давомида сут 0,4 фоиз, кунгабоқар ёғи 0,4 фоиз, олма 1,4 фоиз, лимон 4,1 фоиз, карам 17,8 фоиз, булғор қалампири 9,2 фоиз, пиёз 0,3 фоиз қимматлашган.
Шу билан бирга, февралда иссиқ сув таъминоти 0,4 фоиз, дори воситалари ва тиббиёт маҳсулотлари 0,8 фоизга ошган. Бензин 0,2 фоиз, пропан 4,3 фоиз, ҳаво йўловчи транспорти хизмати 22,4 фоиз, таксилар 0,9 фоиз, темирйўл транспорти 4,5 фоиз қимматлашган.
Хусусий боғчалар хизмати нархи ҳам 0,9 фоизга, репетиторлар 0,5 фоизга, ўқув курслари нархи 0,1 фоизга кўтарилган.
Targetга етиш қийинми?
Марказий банк 2024 йил якунида Ўзбекистонда инфляция даражаси дастлаб 9 фоиз, кейин 9,5 фоиз бўлишини прогноз қилганди. Бироқ йил сўнгида инфляция 9,8 фоиз шаклланди.
2019 йилдаги президент фармонида Марказий банкка инфляцияни 2021 йилда 10 фоизга пасайтириш, 2023 йилда эса 5 фоиз даражадаги доимий инфляцион мақсадни (таргет) ўрнатиш топширилган. Бироқ бу мақсадга ҳалигача етилгани йўқ.
Бугунгача инфляция таргетлари бир неча марта ўзгартирилди. Хусусан, 2020 йилда 5 фоизлик таргет кўрсаткичига эришиш муддати 2023 йилга, 2022 йилдаги мақсад 2024 йил охирига, ўтган йили эса бу муддат 2025 йил иккинчи ярмига кўчирилган.
Сўнгги прогнозларга кўра, 5 фоизлик инфляция даражасига 2026 йилнинг иккинчи ярмида эришиш кутилмоқда.
Жорий йил якунигача инфляция даражаси 7-8 фоизга тушиши прогноз қилинган. Аммо апрелда мамлакатда энергия тарифлари, шунингдек, йил якунигача коммунал хизматлар ва автомобиллар учун ёнилғи нархлари сезиларли оширилиши белгиланган. Бу каби фискал босимлар инфляцион таргетга эришиш даврини узайтириши мумкин.
Изоҳ (0)