Ўзбекистонда маҳаллий ижро этувчи ҳокимият органлари ходимларини рағбатлантиришнинг янги тизими жорий этилади. Бу бўйича президент фармони қабул қилинди.
Фармонга кўра, Қорақалпоғистон Вазирлар кенгаши, вилоятлар ва Тошкент шаҳри ҳамда туман (шаҳар) ҳокимликлари бошқарув ходимлари меҳнатига ҳақ тўлашнинг янги тизими жорий этилади.
Бунда ходимларнинг лавозим маоши ягона тамойил асосида меҳнатга ҳақ тўлашнинг янгиланган тариф сеткаси ҳамда кўп йиллик хизмати ва лавозимини инобатга олган ҳолда табақалашган тариф коэффициентлари асосида шакллантирилади.
Рағбатлантириш тўловлари бошқарув ходимлари томонидан эришилган энг муҳим самарадорлик кўрсаткичлари (KPI) асосида ҳар ойлик устама, малака (мартаба) даражалари учун ва ҳисобот даври якунлари бўйича рағбатлантириш (бонус) тўловлари шаклида тўланади.
Маҳаллий ижро этувчи ҳокимият органлари бошқарув ходимларининг меҳнатига ҳақ тўлаш фақат мазкур фармонда белгиланган шартларда амалга оширилиб, ҳужжатда кўзда тутилмаган қўшимча устамалар, мукофотлар ва бошқа тўловлар тўлаш тақиқланади.
2025 йил 1 августдан ҳокимликларда меҳнатга ҳақ тўлаш жамғармаси қуйидагиларни ўз ичига олади:
- лавозим маоши;
- энг муҳим самарадорлик кўрсаткичларига (KPI) эришганлиги учун лавозим маошига ҳар ойлик устамалар;
- малака (мартаба) даражалари учун тўловлар;
- мукофотлаш ҳамда бонус тўловлари.
Жорий йил июнь ойида ўтказилган президент иштирокидаги йиғилишда 1 августдан ишчан ва жозибадор муҳит яратиш учун барча вилоят ва туман ҳокимликларида иш ҳақи оширилиши айтилганди. Ўшанда ходимларга ишига қараб ойлик устама ва қўшимча бонус берилиши билдирилган.
“Лекин қарс икки қўлдан чиқади. Ўзига юклатилган вазифани бажара олмаган ходимларга чора кўрилади. Ана шунда ҳамма интизом ва режа билан ишлашга ўрганади. Вилоят, туман ҳокимлари, уларнинг ўринбосарлари, вазирлар, банк раҳбарлари яхшилаб эшитиб олсин: ярим йил якуни билан ғалвирни сувдан кўтариб, ким нима иш қилгани бўйича қаттиқ сўров қиламан”, деган Шавкат Мирзиёев.
Йиғилишда президент ҳоким, вазирлар топшириқ кутмасдан, ўзи ташаббус кўрсатиб ишлашга ўтиши шартлигини ҳам таъкидлаган.
Изоҳ (0)