Telegramъдаги каналларда Самарқанд вилоятининг Қўшработ тумани ҳокими Дилшод Шакарбоевнинг қурилиш бўйича ўринбосари ва ходимларини ҳақорат қилгани эшитилган аудио тарқалганди. Самарқанд вилояти ҳокимлиги ахборот хизматининг “Дарё”га билдиришича, вилоят ҳокими ушбу ҳолатга эътибор қаратган.
Интернет тармоғида Қўшработ тумани ҳокими Дилшод Шакарбоевнинг айрим ходимларни ҳақорат қилганлиги юзасидан аудио ёзув эълон қилинди. Мазкур ҳолатга вилоят ҳокимлигининг тегишли масъуллари томонидан аниқлик киритилди. Самарқанд вилояти ҳокимининг тегишли фармойиши билан Қўшработ тумани ҳокими Шакарбоев Дилшод Давроновичга нисбатан ҳайфсан интизомий жазо чораси қўлланилди, дейилади ҳокимлик ахборот хизмати тарқатган маълумотда.
Туман ҳокимининг овози эшитилган аудиодан англашилишича, у аввалига қурилиш ишлари бўйича ўринбосарини ҳақоратлаб, қурувчи тополмаётганини айтади. Шунингдек, ўринбосарини ноинсоф деб, атаб тилга олиб бўлмас сўзлар билан ҳақоратлайди. Ҳокимнинг ҳақорати ва сўкинишидан бошқа ходимлари ҳам бебаҳра қолмайди.
Ўзбекистонда ҳокимларнинг сўкиниши ва ходимларини ҳақоратлаши, шунингдек, тадбиркорларга қўл кўтариши билан боғлиқ ҳолат тез-тез учраб туради. Аввалроқ Қашқадарё вилоятининг Чироқчи тумани ҳокими Файзулла Юсупов ҳам тадбиркорга қўл кўтаргани боис, шунчаки огоҳлантириш билан қутилгани хабар берилганди.
Изоҳ (0)