Ўзбекистон “Адолат” социал-демократик партиясининг XII Қурултойида “Тенг имкониятлар ва адолатли жамият сари!” сайловолди дастури тасдиқланди.
Эслатиб ўтамиз, 27-октябрь куни Ўзбекистонда Қонунчилик палатаси ва маҳаллий Кенгашларга сайловлар бўлиб ўтади.
“Адолат” партиясининг сайловолди дастурида суд-ҳуқуқ соҳаси, соғлиқни сақлаш, таълим ва фан, экология ва атроф-муҳитни муҳофаза қилиш, ташқи ва ички сиёсатга алоҳида эътибор қаратилган.
Шунингдек, соғлиқни сақлаш соҳасига замонавий ахборот-коммуникация технологияларини жорий этиш, “Ақлли тиббиёт” тизимини шакллантириш, нодавлат тиббиёт ташкилотларини “тижорат ташкилотлари” мақомидан нотижорат ташкилотларга ўтказиш, фармацевтика ва тиббиёт ходимлари ўртасидаги яширин тил бириктирганлиги учун жиноий жавобгарликни белгилаш, жойларда аҳолига малакали тиббий ёрдам хизматларини кўрсатиш, гиёҳвандлик воситаларининг ноқонуний айланиши устидан назоратни кучайтириш, самарали қонунчилик механизмларини ишлаб чиқиш каби қатор муҳим ташаббуслар партия дастурида акс эттирилган.
Шунингдек, партия дастурида “Судьялар мақоми тўғрисида”ги Қонунни ишлаб чиқиш ва адвокатура институтини ривожлантириш, соғломлаштириш боғлари ва байрам тадбирлари ўтказиладиган жойларни хусусийлаштиришни тақиқлаш, ногиронлиги бўлган шахслар учун светофорларга махсус овоз бериш мосламаларини ўрнатиш каби ғоялар илгари сурилди.
Яна бир муҳим жиҳатларидан бири, талабаларнинг уй-жой билан боғлиқ муаммоларини бартараф этиш, ўқув адабиётларни қайта кўриб чиқиш орқали олий таълим муассасаларида таълим сифатини ошириш, замонавий хорижий адабиётларни ўзлаштириш ва таржима қилиш бўйича тизимли ишларни йўлга қўйиш, шунингдек, илмий соҳа вакилларининг манфаатларини таъминлаш ва олимларнинг машаққатли ишига муносиб баҳо бериш каби масалаларга алоҳида эътибор қаратилган.
Қурултой доирасида бўлажак сайловда партиядан Ўзбекистон Республикаси Олий Мажлиси Қонунчилик палатаси депутатлигига бир мандатли мажоритар сайлов округлари бўйича 75 нафар ва партия рўйхати бўйича 100 нафар номзод тасдиқланди.
Уларга тегишли барча ҳужжатлар депутатликка номзодларни рўйхатга олиш учун белгиланган тартибда Марказий сайлов комиссиясига тақдим этилиши маълум қилинди.
Изоҳ (0)