Тошкент шаҳрининг Янгиҳаёт туманидаги кўп қаватли турар жой мажмуаси ҳудудида 3 та шумтол дарахти ағнади. Аҳоли тасвирга олган видеоларга кўра, шумтоллар бирини-кетин кўздан ғойиб бўлган.
Биринчи куни тасвирга олганимизда аввалига дарахтларнинг бири, кейинчалик иккинчиси ва учинчиси йўқ бўлиб олди. Дарахт ўсиб турган жойда экскаватор ишлаётганини, кавлаш ишлари олиб борилаётганини видеога олгандим. Эртаси куни қарасак ўша жойда ўсиб турган дарахтлар ғойиб бўлиб қолибди. Шу сабаб видеоларни ОАВ вакилларига юбориб, жамоатчиликни вазиятдан бохабар қилишга ҳаракат қилдик, — дейди исми сир қолишини сўраган янгиҳаётлик фуқаро.
Мазкур видеолар Telegramдаги каналларда тарқалгач, Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси ахборот хизмати раҳбари Умида Юсупова журналистларни воқеа жойига таклиф қилди.
Воқеа жойида журналистларнинг саволларига жавоб қайтарган масъуллар — Янгиҳаёт туман экология бўлими бошлиғи ва ходимлари шумтоллар экскаваторнинг котлован қазиш ишларини бажараётган пайтда, эҳтиётсизлиги оқибатида қўпорилиб кетганини билдирди.
Ер қатлами шағалли бўлгани учун қазиш ишлари давомида ер ўпирилиб, котлованнинг ички қисмига тушиб кетган. Натижада газ трубаси, симёғоч ва учта шумтол ағнаб тушган. Воқеа жойига етиб келган экология ходимлари мутахассисларни жалб қилган ҳолда дарахтларни илдиз қисми билан олиб, бўш жойга кўчиришган. Ва дарахтни омон сақлаб қолиш чораларини кўрган, дейди туман экология бўлими инспектори Фарҳод Болтабоев.
Масъулнинг маълум қилишича, ҳолат юзасидан экскаватор ҳайдовчисига Маъмурий жавобгарлик тўғрисидаги кодекснинг 79-моддасига биноан жами 12 миллион 580 минг сўм жарима қўлланилган.
Фарҳод Болтабоевнинг билдиришича, қурилиш ишларини олиб бораётган тадбиркорга ҳудуддаги дарахтлар ва айнан шу учта шумтол парвариши, уларга зарар етказмаслик мажбурияти юклатилган.
Ушбу ҳудудда кўп қаватли уй қураётган Умид Мустафоевнинг “Дарё”га маълум қилишича, экскаватор катловандан кейинги каток ишларини бажараётган бўлган. Зириллаш ҳолати юз берган пайтда учта дарахт котлаван ичига ағнаган.
Экология ходимлари воқеа жойига етиб келиб, махсус техникалари ёрдамида дахатларни бошқа жойга кўчиришди. Уларга нобуд бўлгани йўқ. Ва айни пайтда парваришланмоқда, дейди қурувчи.
Умид Мустафоевнинг қўшимча қилишича, у кўп қаватли уйни қуришдан аввал ҳам ҳудуддаги тахминан 5-6 та дарахтни нобуд қилмасдан, кўчириш ишларини амалга оширган.
Беш-олтита дарахт бўлган. Дарахтларни кўчиришга рухсатнома олиб, айнан шу кўчириш ишлари билан шуғулланувчи ташкилотни жалб қилган ҳолда дахатларни нобуд қилмай, Тошкент вилояти ҳудудига кўчирганмиз. Бирорта дарахт кесиб ташланмаган, дейди у.
Қурувчининг аниқлаштиришича, ҳудуддан кўчирилган дахатларнинг ўз вақтида бошқа жойга ўтказилиги, нобуд қилинмай парваришланиши учун ҳар бир дарахтга тахминан 50-60 миллион сўм миқдоридаги тўловни амалга оширган.
“Дарё” тадбиркор берган маълумотга аниқлик киритиб, қурилиш майдонида ҳақиқатдан ҳам 5-6 та дарахтлар бўлгани ва уларнинг кўчирилиши, парваришига тўланган суммани билиш мақсадида Экология бошқармаси, туман экология бўлими, шунингдек, Экология вазирлиги қошидаги экологик экспертиза маркази масъуллари билан боғланди. Улар маълумот аниқлаштирилгач, очиқланишини маълум қилди.
Изоҳ (0)