Telegram’dagi kanallarda Samarqand viloyatining Qo‘shrabot tumani hokimi Dilshod Shakarboyevning qurilish bo‘yicha o‘rinbosari va xodimlarini haqorat qilgani eshitilgan audio tarqalgandi. Samarqand viloyati hokimligi axborot xizmatining “Daryo”ga bildirishicha, viloyat hokimi ushbu holatga e’tibor qaratgan.
Internet tarmog‘ida Qo‘shrabot tumani hokimi Dilshod Shakarboyevning ayrim xodimlarni haqorat qilganligi yuzasidan audio yozuv e’lon qilindi. Mazkur holatga viloyat hokimligining tegishli mas’ullari tomonidan aniqlik kiritildi. Samarqand viloyati hokimining tegishli farmoyishi bilan Qo‘shrabot tumani hokimi Shakarboyev Dilshod Davronovichga nisbatan hayfsan intizomiy jazo chorasi qo‘llanildi, deyiladi hokimlik axborot xizmati tarqatgan ma’lumotda.
Tuman hokimining ovozi eshitilgan audiodan anglashilishicha, u avvaliga qurilish ishlari bo‘yicha o‘rinbosarini haqoratlab, quruvchi topolmayotganini aytadi. Shuningdek, o‘rinbosarini noinsof deb, atab tilga olib bo‘lmas so‘zlar bilan haqoratlaydi. Hokimning haqorati va so‘kinishidan boshqa xodimlari ham bebahra qolmaydi.
O‘zbekistonda hokimlarning so‘kinishi va xodimlarini haqoratlashi, shuningdek, tadbirkorlarga qo‘l ko‘tarishi bilan bog‘liq holat tez-tez uchrab turadi. Avvalroq Qashqadaryo viloyatining Chiroqchi tumani hokimi Fayzulla Yusupov ham tadbirkorga qo‘l ko‘targani bois, shunchaki ogohlantirish bilan qutilgani xabar berilgandi.
Izoh (0)