Ўзбекистонда айрим товар ва хизматларга ҚҚС имтиёзлари бекор қилинади 

Ўзбекистонда айрим товар ва хизматларга ҚҚС имтиёзлари бекор қилинади, деб хабар бермоқда Адлия вазирлиги ахборот хизмати. 

Унга кўра, “Ўзбекистон Республикаси президентининг солиқ ва божхона имтиёзларини беришни назарда тутувчи айрим ҳужжатларига ўзгартиришлар ва қўшимча киритиш, шунингдек, баъзиларини ўз кучини йўқотган деб ҳисоблаш тўғрисида”ги президент фармони қабул қилинди.

Фармонга асосан, 2025 йил 1 январдан:

• йўловчиларни ягона тарифлар бўйича ташиш хизматларини кўрсатиш айланмаси ҳамда ногиронлиги бўлган шахсларнинг жамоат бирлашмалари ягона иштирокчиси ҳисобланган юридик шахслар томонидан реализация қилинадиган товарлар ва хизматлар учун қўшилган қиймат солиғи бўйича имтиёзлар бекор қилинади;
• янги барпо этилаётган боғлар, токзорлар ва тутзорлар эгаллаган ерлар учун юридик шахслардан олинадиган ер солиғини тўлашдан озод қилиш тарзидаги имтиёзни бекор қилган ҳолда, мазкур ер участкалари бўйича солиқ ставкаси 50 фоизга камайтирилади.

Бундан аввал президентнинг 30 августдаги фармони билан айрим тадбиркорларга ҚҚСнинг бир қисми қайтарилиши белгиланган. Фармонга мувофиқ, 2024 йил 1 октябрдан туроператорлик ва меҳмонхона хизматларини, 2025 йил 1 январдан умумий овқатланиш хизматларини кўрсатувчи тадбиркорларга 2028 йил 1 январгача ҳар ойнинг 25-санасига қадар тўланган ҚҚСнинг бир қисмини қуйидаги миқдорларда республика бюджетидан қайтариш тизими жорий этилади:

ойлик товар айланмасининг нақд пулсиз қисми:

• 60 фоиздан ошган умумий овқатланиш корхоналарига – бюджетга тўланган ҚҚСнинг 40 фоизи;
• 60 фоиздан кам умумий овқатланиш корхоналарига – бюджетга тўланган ҚҚСнинг 20 фоизи;
• туроператорлик ва меҳмонхона хизматларини кўрсатувчи тадбиркорларга – бюджетга тўланган ҚҚСнинг 20 фоизи.

 2024 йил 1 ноябрдан барча учун очиқ ҳолатда юритиладиган Инсон ҳаёти ва соғлиғига юқори хавф солувчи омиллар реестри жорий қилинади.

2025 йил 1 январдан назорат қилувчи органлар томонидан тадбиркорлар фаолиятини тўхтатиб туришга фақатгина реестрга киритилган омиллар асосида йўл қўйилади.

Шу санадан бошлаб назорат қилувчи органлар томонидан тадбиркорлар фаолиятида ҳуқуқбузарлик содир этиш хавфини аниқлаш бўйича “Хавфни таҳлил қилиш” электрон тизими жорий этилади.

Шунингдек, айрим тадбиркорларга ҚҚСнинг 40 фоизгача қисми кешбэк сифатида қайтариб берилиши ҳақида 20 август куни Нукус шаҳрида бўлиб ўтган президентнинг тадбиркор ва инвесторлар билан учрашувида маълум қилинганди. Мулоқотда давлат раҳбари умумий овқатланиш ҳамда меҳмонхона хизматларининг энг катта муаммоси ҚҚС ва ишчилар ҳисобини юритиш эканидан хабардорлигини айтганди.