Ижтимоий тармоқларда бюро ходимлари вояга етмаган болаларни машинада мажбурлаб олиб кетгани ҳақида видео тарқалди. МИБ ахборот хизмати бу ҳақда “Дарё”га изоҳ берди.
Унга кўра, бюронинг Шовот тумани бўлими иш юритувидаги фуқаролик ишлари бўйича Шовот туманлараро судининг ижро варақасига асосан қарздорлар Б.Абдуллаев ҳамда С.Эгамовалардан ундирувчи Г.Ибрахимованинг тарбиясига икки нафар фарзандини олиб бериш белгиланган.
9 сентябрь куни қарздор С.Эгамовага ижро ҳужжати мазмуни ўқиб эшиттирилганда қарздор ижро ҳужжати ижросини ўз ихтиёри билан таъминлашдан бош тортган.
Шундан сўнг ундирувчи Г.Ибрахимова, қарздор С.Эгамова, туман ИИБ ходими, холислар иштирокида Шовот туманидаги 34-сонли мактабга борилиб, мазкур мактаб директорига суд ижро ҳужжати ўқиб эшиттирилган. Ундирувчининг икки нафар фарзанди мажбурий тартибда унинг тарбиясига соғ-саломат олиб берилиши таъминланган ва бу ҳақда тегишли далолатнома расмийлаштирилган.
Ҳозирда фарзандлар онаси билан бирга ва мактабда таълим олишни давом эттирмоқда.
Бундан аввал Қорақалпоғистоннинг Элликқалъа туманидаги мактабларнинг бирида уч киши синфга бостириб кириб, болани мажбуран олиб чиқиб кетгани ҳақида хабар берилганди. 1-синф ўқувчиси бўлган бола Х.Й.нинг онаси С.Ш. дарс жараёнини бузган ҳолда синфга кириб бориб, ўқитувчи уни тўхтатишга уринишига қарамасдан, куч ишлатиб мажбуран ўғлини синфдан олиб кетган.
Изоҳ (0)