Тошкентнинг Шайхонтоҳур туманида ИИО ходимлари аёл кишини уйидан мажбурий олиб чиқиб, машинада олиб кетгани ҳақида хабар ва ҳолат акс этган видеолар ижтимоий тармоқларда тарқалди. Пойтахт ИИББ матбуот хизмати ҳолат юзасидан маълумот берди.
Унда айтилишича, 10 август куни Н.Б. ва З.А. Шайхонтоҳур тумани Жанггоҳ мавзесида жамиятда юриш-туриш қоидаларини қасддан менсимасдан ўзаро жанжаллашиб, жамоат тартибини бузган. Ҳолат юзасидан ўтказилган текширув жараёнида фуқаро Н.Б. чақирилган вақтда ички ишлар органлари ходимининг ИИБга кўрсатилган муддатда келиш тўғрисидаги қонуний талабларини бажармаган.
Юқоридаги ҳолат юзасидан фуқароларга нисбатан Маъмурий жавобгарлик тўғрисидаги кодекснинг 183-моддаси ва 194-моддаси билан маъмурий баённома расмийлаштирилган ва кўриб чиқиш учун жиноят ишлари бўйича туман судига тақдим этилган. Бироқ Н.Б. бир неча маротаба суд томонидан чақиртирилган бўлишига қарамасдан, сабабсиз суд мажлисига келмагани сабабли уни мажбурий келтириш қарори чиқарилган.
9 сентябрь куни фуқаро Н.Б. ИИО ходимлари томонидан мажбурий тартибда судга олиб кетилаётгани ҳолати видеода акс этган.
Жиноят ишлари бўйича Шайхонтоҳур тумани суди томонидан фуқаролар Н.Б. ва З.А.га нисбатан 3 сутка маъмурий қамоқ жазоси тайинланган. Ходимларнинг ҳаракати юзасидан эса прокуратура томонидан текширув ўтказилмоқда.
Изоҳ (0)