АҚШ ҳукумати Венесуэла президенти Николас Мадурони ҳибсга олишга ёрдам берганларга тақдим этиладиган мукофот пулини икки баравар ошириб, 50 миллион долларга етказди. Бу ҳақда BBC хабар берди.
АҚШ Бош прокурори Пам Бондига кўра, Мадуро тўғридан тўғри гиёҳванд моддалар контрабандасига алоқадор бўлиб, Вашингтон сиёсатчини “дунёдаги энг йирик наркотрафикчилардан бири” деб атамоқда. Қўшма Штатлар аллақачон сиёсатчини қўлга тушириш учун 25 миллион доллар мукофот эълон қилган эди.
Маълум қилинишича, у Колумбиядаги FARC исёнчилари билан ҳамкорлик қилиб, АҚШга кокаин оқимини “қурол сифатида” ишлатишда айбланмоқда. Шу пайтгача Мадуронинг ўзи ва шерикларига тегишли 30 тонна кокаин мусодара қилинган, шундан қарийб 7 тоннаси тўғридан тўғри президентга боғлиқ ҳисобланади.
Венесуэла ҳукумати бу айбловларга расмий жавоб бермаган. Мадуро эса аввалдан АҚШнинг бундай даъволарини рад этиб келади. АҚШда Дональд Трамп президентлиги даврида Мадуро ва бир қатор юқори лавозимли венесуэлалик амалдорлар наркотерроризм, коррупция ва гиёҳванд моддалар савдосида айбланган. Вашингтон, шунингдек, Мадурони “Трен де Арагуа” гуруҳи ва Мексикадаги қудратли “Синалоа” картели билан ҳамкорлик қилишда гумон қилмоқда.
2013 йилда Венесуэла ҳокимиятига келган Мадуро мухолифларни бостириш ва норозиларни зўравонлик билан бўйсундиришда ҳам айбланади. Сиёсатчи 2024 йили ўтказилган ва халқаро ҳамжамият томонидан тан олинмаган сайловдан кейин ҳам ҳокимиятини сақлаб қолишга муваффақ бўлган.
Венесуэланинг собиқ ҳарбий разведка раҳбари Уго Карвахаль 2025 йил июнь ойида АҚШда бир неча гиёҳванд моддалар контрабандаси айбловлари бўйича судланган. У аввал айбловларни рад этган бўлса-да, кейинроқ айбини тан олиб, ҳозирда АҚШ ҳукумати билан Мадурога қарши ҳамкорлик қилаётгани тахмин қилинмоқда.
Маълумот учун, йил бошида АҚШдан ташқари Буюк Британия ва Европа иттифоқи ҳам Мадуронинг қайта президент бўлиши ортидан унинг ҳукуматига қарши бир қанча санкциялар жорий қилган.
Изоҳ (0)