“Фарҳод” чегара божхона постида катта ҳажмдаги тирик тошбақаларнинг олиб чиқилишига бўлган уриниш фош этилди. Бу ҳақда Тошкент вилояти Божхона бошқармаси ахборот хизмати хабар берди.
Маълум қилинишича, “Фарҳод” чегара божхона пости ходимлари ҳамда Контрабандага қарши курашиш гуруҳи тезкор ходими томонидан, Бекобод шаҳар ДХХ тезкор ходимлари билан ҳамкорликда, 400 дона тошбақани яширинча олиб чиқишга бўлган уриниш тўхтатиб қолинди.
Мамлакатдан қўшни давлатга чиқиб кетиш учун “Фарҳод” чегара божхона постига пиёда ҳолда кириб келган икки нафар фуқаро юклари божхона кўригидан ўтказилганида оғзаки сўровда маълум қилинмаган ва ҳеч қандай ҳужжатлари бўлмаган 153 дона тошбақа борлиги аниқланди.
Шундан сўнг олинган маълумотлар асосида божхона ходимлари томонидан тадбир давом эттирилиб, “Фарҳод” чегара божхона пост атрофида тўхтаб турган автотранспорт воситаси холислар иштирокида кўздан кечирилганида, автотранспорт воситасининг юкхонаси ҳамда салон қисмининг орқа ўриндиғида 4 дона қутиларга жойлаштирилган 247 дона тошбақа борлиги аниқланди.
Табиий популяцияни сақлаб қолиш учун ушбу тур Қизил китобнинг янги нашрига киритилган. Айни дамда 400 дона Ўрта Осиё тошбақалари Бекобод шаҳар экология ва атроф муҳитни муҳофаза қилиш бўлимига вақтинча сақлашга топширилди. Кейинчалик улар табиатга қўйиб юборилади.
Ҳозирда мазкур ҳолат юзасидан божхона органлари томонидан суриштирув ҳаракатлари давом эттирилмоқда.
Бундан аввал Фарғонада 83 дона тошбақани қўшни давлатга олиб чиқиб кетмоқчи бўлган шахс қўлга олинган эди.
Изоҳ (0)