Амалдаги тартибга кўра, банклар 12 ойдан ортиқ муддат давомида амалиётлар рўй бермаган карталарни бир томонлама блоклашлари мумкин, деб хабар бермоқда Ҳумо тўлов тизими матбуот хизмати.
“Кутилмаганда блокланишнинг олдини олиш учун, фойдаланилмаётган Ҳумо карталарингизни @humocardbot орқали олдиндан вақтинчалик блоклаб қўйиш тавсия этилади. Бу карталарингиз хавфсизлигини таъминлашга ва уларни банк томонидан (заруриятсиз) блокланишининг олдини олишга ёрдам беради”, дейилади хабарда.
Январь ойи охирида “Bankers.уз” нашри банклар 12 ой давомида “ҳаракатсиз” бўлган карталарни блоклаши ҳақида мижозларни огоҳлантира бошлаганини маълум қилганди. Бу Марказий банк томонидан ишлаб чиқилган янги талаблар билан боғлиқ бўлиши мумкин. Унга кўра, битта жисмоний шахсга (битта ЖШШИРга) эмиссия қилинадиган карталар сонини битта банкда 5 тагача, барча банкларда 20 тагача чеклаш бўйича вақтинчалик тартиб жорий қилинганди.
Бироқ Марказий банк тижорат банклари учун 1 йилдан бери фойдаланилмаётган карталарни блоклаш бўйича талаблар жорий этилишини расман эълон қилмаган.
Айни пайтда тижорат банклари томонидан фуқароларга тегишли банк карталари ҳақида SMS хабарлар юборилмоқда. Марказий банк бунга изоҳ бериб, ушбу SMS хабарлар фуқароларни уларнинг номига расмийлаштирилган банк карталари тўғрисида хабардор қилиш мақсадида юборилаётганини билдирди.
Изоҳ (0)