Ижтимоий тармоқларда Сардоба туманидаги 1-сонли мактабда аёл ўқитувчини ургани акс этган видео тарқалди.
Видеода аёл (ўқувчининг онаси деб тахмин қилинмоқда) синфда ўқитувчига қўпол муомалада бўлиб, унинг юзига мушт тушургани, ўлдириш билан таҳдид қилганини кўриш мумкин. Бунга нима сабаб бўлгани ҳозирча номаълум. Тармоқда тарқалган хабарларга кўра, ўқитувчи яхши ўқимаган ўқувчига жиддий танбеҳ бергани учун унинг онаси келиб шундай йўл тутган.
Вилоят мактабгача ва мактаб таълими бошқармаси ҳолат Сардоба туманидаги 1-сонли мактабда содир бўлганини тасдиқлади. Воқеага мактабгача ва мактаб таълими вазири Ҳилола Умарова ҳам муносабат билдириб, ҳолат Мактабгача ва мактаб таълими вазирлиги томонидан назоратга олинганини маълум қилди. Вазир бу воқеа Сирдарё вилоят ММТБ ишчи гуруҳи томонидан ўрганилаётганини, ўрганиш натижаларига кўра тез орада жамоатчиликка қўшимча маълумот берилишини билдирди.
Мактабда ўқитувчиларнинг калтакланиши
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди.
Изоҳ (0)