Ўзбекистондаги барча ичимлик суви таъминоти корхоналарида сифат мониторингини юритиш ва маълумотларни бошқариш марказларини яратиш режалаштирилмоқда. Бу жамоатчилик муҳокамасига қўйилган 2025 йилга мўлжалланган давлат дастури лойиҳасида кўзда тутилган.
Ҳудудларда ичимлик сув сифати мониторингини юритувчи марказий лаборатория ташкил этиш, барча шаҳар ва туманлардаги ичимлик сув сифатини назорат қилиш учун лабораторияларга бириктириш ёки ҳудудий санитария-эпидемиологик осойишталик ва жамоат саломатлиги бўлимлари билан шартномалар расмийлаштириш кўзда тутилмоқда.
Ичимлик сув сифатини мониторингини юритадиган лабораторияларининг техник жиҳатдан малакали бўлиши лозим.
Ижро учун асосий масъул этиб “Ўзсувтаъминот” белгиланди.
Ичимлик сувининг сифати қандай бўлиши керак?
Ичимлик суви бутун дунё стандартлари бўйича озиқ-овқат маҳсулоти сифатида таснифланади. У инсон саломатлиги учун хавфсиз бўлиши учун лаборатория синовларидан ўтказилади.
Биринчи навбатда танланган сув манбалари давлат стандарти ЎзДСт 951:2011 “Марказлаштирилган хўжалик-ичимлик суви билан таъминлаш манбалари, гигиеник, техникавий талаблар ва танлаш қоидалари” талабларига жавоб бериши шарт. Агар танланган сув манбаларидаги сифат кўрсаткичлари гигиеник талабларга жавоб бермаса, у ҳолда сувлар махсус тозалаш иншоотларида босқичма-босқич қайта тозаланади.
Ўзбекистон аҳолисининг ичимлик суви билан таъминланганлик даражаси
2025 йил январь ойи ҳолатига кўра, Ўзбекистон аҳолисининг 80,9 фоизи марказлашган ичимлик суви билан таъминланган.
- Андижон — 91,9 фоиз;
- Бухоро — 74 фоиз;
- Фарғона — 81 фоиз;
- Жиззах — 73,8 фоиз;
- Навоий — 86 фоиз;
- Наманган — 84,9 фоиз;
- Қашқадарё — 74,2 фоиз;
- Самарқанд — 78,6 фоиз;
- Сурхондарё — 70 фоиз;
- Сирдарё — 87,6 фоиз;
- Тошкент — 81 фоиз;
- Хоразм — 91,2 фоиз;
- Тошкент шаҳри — 98 фоиз;
- Қорақалпоғистон Республикаси — 74 фоиз.
“Ўзсувтаъминот” ахборот хизмати раҳбари Акмал Муродовнинг маълум қилишича, сўнгги 6 йилда аҳолининг ичимлик суви таъминотини яхшилашга 10 триллион сўмга яқин маблағ йўналтирилди. Ушбу маблағлар ҳисобидан 1 176 та сув иншооти ва 20,8 минг километр ичимлик суви тармоқлари тортилди.
Ўзбекистонда 2026 йилда марказлашган ичимлик суви билан таъминланганлик 90 фоизга, оқова сув хизмати билан қамраб олинганлик даражаси 35 фоизга етказилади.
Изоҳ (0)