2025 йилда номинал валюта курсида кескин ўзгариш бўлиши кутилмаяпти. Бу ҳақда Марказий банк раиси Тимур Ишметов журналистлар билан мулоқотда маълум қилди, дея хабар берди “Дарё” мухбири.
23 январь куни Тошкент шаҳрида бўлиб ўтган матбуот анжуманида Тимур Ишметов номинал валюта курси билан боғлиқ кутилмалар ҳақида гапирди. Марказий банк раҳбарининг айтишича, 2024 йилда сўм долларга нисбатан 4,7 фоиз қадрсизланган.
Бу йил ҳам девалвация даражаси катта ўзгаришига таъсир қилувчи омиллар йўқ деб ҳисоблаяпмиз. Валюта курси кескин тебранишига асос кўрмаяпмиз. Албатта, бу ички валюта бозорига валютани кириб келиши ва чиқиши орасидаги талаб ва таклиф асосида шаклланади. Курснинг қанча бўлишини олдиндан ҳеч ким аниқ айта олмайди, бу нотўғри бўлади.
Ўтган йили трансчегаравий пул тушумлари 30 фоиз ошган. Экспорт яхши ўсган, яъни олтинсиз ҳам 16 фоизга ошди. Валюта тушумлари кўпроқ бўлган. 2025 йилга ҳам бундан ёмон бўлишига прогнозлар йўқ. Валюта тушумлари ижобий бўлишига прогноз кўпроқ. Бундай шароитда девалвация кескин бўлишига асос йўқ, деди Марказий банк раҳбари.
Маълумот учун, 2023 йилда сўм АҚШ валютасига нисбатан 9,7 фоизга, 2022 йилда 3,94 фоизга заифлашганди.
Аввалроқ Тимур Ишметов мамлакат ташқи қарзи кўпайишига бюджет тақчиллиги сабаб бўлаётгани, бу ҳолат валюта бозорига ҳам таъсир қилаётганини айтган.
Изоҳ (0)