2025-yilda nominal valyuta kursida keskin o‘zgarish bo‘lishi kutilmayapti. Bu haqda Markaziy bank raisi Timur Ishmetov jurnalistlar bilan muloqotda maʼlum qildi, deya xabar berdi “Daryo” muxbiri.
23-yanvar kuni Toshkent shahrida bo‘lib o‘tgan matbuot anjumanida Timur Ishmetov nominal valyuta kursi bilan bog‘liq kutilmalar haqida gapirdi. Markaziy bank rahbarining aytishicha, 2024-yilda so‘m dollarga nisbatan 4,7 foiz qadrsizlangan.
Bu yil ham devalvatsiya darajasi katta o‘zgarishiga taʼsir qiluvchi omillar yo‘q deb hisoblayapmiz. Valyuta kursi keskin tebranishiga asos ko‘rmayapmiz. Albatta, bu ichki valyuta bozoriga valyutani kirib kelishi va chiqishi orasidagi talab va taklif asosida shakllanadi. Kursning qancha bo‘lishini oldindan hech kim aniq ayta olmaydi, bu noto‘g‘ri bo‘ladi.
O‘tgan yili transchegaraviy pul tushumlari 30 foiz oshgan. Eksport yaxshi o‘sgan, yaʼni oltinsiz ham 16 foizga oshdi. Valyuta tushumlari ko‘proq bo‘lgan. 2025-yilga ham bundan yomon bo‘lishiga prognozlar yo‘q. Valyuta tushumlari ijobiy bo‘lishiga prognoz ko‘proq. Bunday sharoitda devalvatsiya keskin bo‘lishiga asos yo‘q, dedi Markaziy bank rahbari.
Maʼlumot uchun, 2023-yilda so‘m AQSH valyutasiga nisbatan 9,7 foizga, 2022-yilda 3,94 foizga zaiflashgandi.
Avvalroq Timur Ishmetov mamlakat tashqi qarzi ko‘payishiga byudjet taqchilligi sabab bo‘layotgani, bu holat valyuta bozoriga ham taʼsir qilayotganini aytgan.
Izoh (0)