Ўтган йили мамлакат иқтисодий ўсиши прогноздаги кўрсаткичдан юқори даражада шаклланди. Бу ҳақда Иқтисодиёт ва молия вазирлиги маълум қилди.
2024 йилда Ўзбекистон ялпи ички маҳсулоти 1,45 квадриллион сўмдан ошди. Бу миқдор йил давомида Марказий банк эълон қилган доллар курсларининг ўртача миқдоридан келиб чиқилса, тахминан 115 млрд долларга тенг бўлади.
Статистика агентлиги маълумотларига кўра, 2024 йил якунида Ўзбекистон аҳолиси сони 37 миллион 543 минг нафардан ортган. Шунда ЯИМ миқдори аҳоли жон бошига камида 3 минг доллардан тўғри келади.
2023 йил ноябрда 2024 йилги иқтисодий ўсиш 5,6-5,8 фоиз атрофида бўлиб, 1,3 квадриллион сўмга етиши прогноз қилинганди.
Вазирлик маълумотларига кўра, 2024 йилда ташқи савдо айланмаси ҳажми 65,9 миллиард доллардан ортган. Шундан экспорт 26,95 миллиард доллардан ортиб, йиллик 8,4 фоизга ўсган. Импорт салкам 38,98 миллиард долларни ташкил этиб, 0,8 фоизга кўпайган.
Маълумот учун, 2023 йилда Ўзбекистон ЯИМ ҳажми 6 фоиз ўсиб, 90,9 миллиард долларга етганди. Бу рақам ўша давр курсида аҳоли жон бошига ҳисоблаганда 2,5 минг доллардан тўғри келган.
Изоҳ (0)