Ўзбекистон ва Эрон ўртасида ҳар томонлама ҳамкорликни мустаҳкамлаш бўйича 2025—2027 йилларга мўлжалланган “йўл харитаси” имзоланди. Бу ҳақда Ўзбекистон ҳукумати матбуот хизмати хабар берди.
Маълум қилинишича, бош вазир Абдулла Арипов бошчилигидаги ҳукумати делегацияси расмий ташриф билан Эронда бўлиб турибди. 11 май куни Теҳрондаги Ўзбекистон бош вазири ва Эрон биринчи вице-президенти Муҳаммад Ризо Ореф бошчилигидаги ҳукуматлар делегацияларининг учрашуви бўлиб ўтди.
Томонлар ушбу учрашув ҳамкорликнинг янги йўналишларини белгилаб олиш учун қулай имконият эканини қайд этиб, икки томонлама товар айирбошлаш ҳажмини президентлар белгилаб берган 2 миллиард долларга чиқариш имкониятларини атрофлича муҳокама қилди.
Хусусан, транспорт-логистика соҳасидаги ҳамкорликни янада мустаҳкамлаш муҳим аҳамиятга эга. Бунинг учун мазкур йўналишда кўп йиллардан буён ўз ечимини кутаётган муайян масалаларни зудлик билан ҳал этиш юзасидан саъй-ҳаракатларни бирлаштириб, аниқ амалий чораларни кўриш лозимлиги қайд этилди.
Шунингдек, томонлар саноат кооперациясини ривожлантириш, мамлакатлар ҳудудлари аро алоқаларни фаоллаштириш, илм-фан, таълим, технология ва инновациялар соҳаларида ҳамкорликни кенгайтириш, шу билан бирга, туризм, маданий-гуманитар йўналишлардаги ҳамкорликни янги босқичга олиб чиқиш муҳим эканини билдирди.
Олий даражада эришилган келишувлар ижроси ўз вақтида таъминланишида тегишли вазирлик ва идоралар янада фаол ишлашлари лозимлиги айтилди.
Учрашув сўнгида Ўзбекистон ва Эрон ўртасида ҳар томонлама ҳамкорликни мустаҳкамлаш бўйича 2025—2027 йилларга мўлжалланган “йўл харитаси”, Имтиёзли савдо битимининг товарлар рўйхатини тасдиқлаш баённомаси, Ўсимликлар ҳимояси ва карантини соҳасида ҳамкорлик тўғрисидаги англашув меморандуми, Ҳалол стандарт соҳасида ҳамкорлик тўғрисидаги англашув меморандуми имзоланди.
Шу куни Теҳронда Ўзбекистон—Эрон бизнес форуми ўтказилди. Унда Ўзбекистондан 100 нафардан ортиқ тадбиркорлар, вазирлик ва идоралар вакиллари ўзларининг турли йўналишдаги таклиф ва ташаббуслари билан қатнашиб, “B2B” шаклда музокаралар олиб борди.
Ўзбекистон ва Эрон муносабатлари
Икки давлат ўзаро савдо ва юк ташиш кўрсаткичлари, қўшма корхоналар сони ошмоқда, пойтахтлар ўртасида мунтазам тўғридан тўғри авиақатновлар амалга оширилмоқда, ишбилармонлик ва маданий-гуманитар алмашинув кенгаймоқда. Ўзаро савдода барқарорлик кузатилмоқда. Хусусан, товар айирбошлаш ҳажми 500 миллион долларга етди, қўшма корхоналар сони 210 дан ошди. 2024 йил октябрида Эрон ва Ўзбекистон ўзаро товар айирбошлаш ҳажмини 10 баробарга ошириш мақсадида имтиёзли савдо билан шуғулланиш бўйича дастлабки келишувларга эришди.
2025 йил 1 апрель куни Шавкат Мирзиёев ва Эрон президенти Масъуд Пезешкиён телефон орқали мулоқот қилиб, Ўзбекистон—Эрон муносабатларини янада ривожлантиришнинг долзарб масалаларини атрофлича кўриб чиққанди. Унда кимё ва нефть-кимё тармоқлари, тўқимачилик ва озиқ-овқат саноати, қишлоқ хўжалиги, қурилиш материаллари тармоғи ва бошқа йўналишлардаги кооперация лойиҳаларини қўллаб-қувватлаш ва жадал амалга оширишга алоҳида эътибор қаратилди.
Икки давлат раҳбалари 2024 йилнинг октябрида Ашхободдаги халқаро форум доирасида учрашув ўтказганида ҳам Ўзбекистон билан Эрон ўртасидаги кўп қиррали муносабатларни ривожлантиришнинг долзарб масалалари муҳокама қилинганди.
Изоҳ (0)