Ўзбекистонда 68 нафар боланинг ўлими ва 16 нафар боланинг ногирон бўлиб қолишига сабабчи бўлган сироп ишлаб чиқарувчиси Ўзбекистон ДХХ томонидан қидирувга берилган, Юнусобод туман суди уни қамоққа олиш ҳақида ажрим чиқарган. Бу ҳақда “Дарё” журналисти хабар берди.
1972 йил Ҳиндистонда туғилган, “Док-1 Макс” сиропи ишлаб чиқарилган Marion Biotech Pvt. Ltd. корхонаси раҳбари Сачин Жаин 2023 йилнинг 4 май куни Ўзбекистон ДХХ терговчиси томонидан қидирувга берилган. Бош прокурор ўринбосарининг илтимосномасига биноан Сачинни сиртдан қамоққа олиш ҳақида хулоса қилинган. Шундан келиб чиққан ҳолда Сачин Жаин 2023 йилнинг 10 май куни суд қилинган.
Ҳиндистонлик тадбиркор Жиноят ишлари бўйича Юнусобод туман судининг ёпиқ суд мажлисида бир гуруҳ шахслар билан олдиндан тил бириктириб, одамлар ўлимига сабаб бўлган сифатсиз дори воситаларини олиш, сақлаш, ташиш ва ўтказиш жиноятларини содир этишда айбланган. Quramax Medical МЧЖ директори Сингҳ Рагвендра Пратар ва шу ташкилотнинг савдо директори Б.Қамбаралиев билан биргаликда болалар ўлимига сабабчи бўлгани таъкидланган. Шу сабаб унга қамоққа олиш тарзидаги эҳтиёт чорасини қўллаш, ушлангач, ДХХ тергов ҳибсхонасига жойлаштирилиши белгиланган. Бироқ Сачин шу пайтга қадар ушланмаган.
Ҳиндистонга бориб, Сачин ҳақида суриштирган адвокатларнинг айтишича, ҳиндистонлик тадбиркор айни пайтда Дубайда яшамоқда.
Тергов томонидан Ташқи ишлар вазирлиги орқали Ҳиндистонга хат юборилган ҳамда Marion Biotech Pvt. Ltd. корхонаси ҳақида расмий маълумот сўралиб, жиноий ишлари ҳақида сўралган. Бироқ бу сўровга Ҳиндистон томон жавоб бермаган, — дейди адвокат Темур Раҳматов.
Адвокатнинг аниқлаштиришича, Сачинга Ўзбекистонда қидирув эълон қилингач, БААда унинг ушлангани хабар қилинган. Ўзбекистон томонидан Сачинни ушлашга рухсат берувчи ҳужжатлардан сўралган. Бундай ҳужжатлар Ўзбекистон томонидан тезкорлик билан тақдим этилса-да, Сачин БААда қўйиб юборилгани билдирилган.
Изоҳ (0)