O‘zbekistonda 68 nafar bolaning o‘limi va 16 nafar bolaning nogiron bo‘lib qolishiga sababchi bo‘lgan sirop ishlab chiqaruvchisi O‘zbekiston DXX tomonidan qidiruvga berilgan, Yunusobod tuman sudi uni qamoqqa olish haqida ajrim chiqargan. Bu haqda “Daryo” jurnalisti xabar berdi.
1972-yil Hindistonda tug‘ilgan, “Dok-1 Maks” siropi ishlab chiqarilgan Marion Biotech Pvt. Ltd. korxonasi rahbari Sachin Jain 2023-yilning 4-may kuni O‘zbekiston DXX tergovchisi tomonidan qidiruvga berilgan. Bosh prokuror o‘rinbosarining iltimosnomasiga binoan Sachinni sirtdan qamoqqa olish haqida xulosa qilingan. Shundan kelib chiqqan holda Sachin Jain 2023-yilning 10-may kuni sud qilingan.
Hindistonlik tadbirkor Jinoyat ishlari bo‘yicha Yunusobod tuman sudining yopiq sud majlisida bir guruh shaxslar bilan oldindan til biriktirib, odamlar o‘limiga sabab bo‘lgan sifatsiz dori vositalarini olish, saqlash, tashish va o‘tkazish jinoyatlarini sodir etishda ayblangan. Quramax Medical MCHJ direktori Singh Ragvendra Pratar va shu tashkilotning savdo direktori B.Qambaraliyev bilan birgalikda bolalar o‘limiga sababchi bo‘lgani ta’kidlangan. Shu sabab unga qamoqqa olish tarzidagi ehtiyot chorasini qo‘llash, ushlangach, DXX tergov hibsxonasiga joylashtirilishi belgilangan. Biroq Sachin shu paytga qadar ushlanmagan.
Hindistonga borib, Sachin haqida surishtirgan advokatlarning aytishicha, hindistonlik tadbirkor ayni paytda Dubayda yashamoqda.
Tergov tomonidan Tashqi ishlar vazirligi orqali Hindistonga xat yuborilgan hamda Marion Biotech Pvt. Ltd. korxonasi haqida rasmiy ma’lumot so‘ralib, jinoiy ishlari haqida so‘ralgan. Biroq bu so‘rovga Hindiston tomon javob bermagan, — deydi advokat Temur Rahmatov.
Advokatning aniqlashtirishicha, Sachinga O‘zbekistonda qidiruv e’lon qilingach, BAAda uning ushlangani xabar qilingan. O‘zbekiston tomonidan Sachinni ushlashga ruxsat beruvchi hujjatlardan so‘ralgan. Bunday hujjatlar O‘zbekiston tomonidan tezkorlik bilan taqdim etilsa-da, Sachin BAAda qo‘yib yuborilgani bildirilgan.
Izoh (0)