Кинематография агентлиги директори Фирдавс Абдухолиқов бошқа ишга ўтгани сабаб эгаллаб турган лавозимидан озод этилди. Бу ҳақда “Дарё” манбаси хабар берди.
Манбанинг хабар беришича, агентликка Шуҳрат Ризаев раҳбар бўлади.
Фирдавс Абдухолиқов эса Ислом цивилизацияси марказига директор бўлиши кутилмоқда.
2020 йили 100 дан ортиқ киноижодкор Фирдавс Абдухолиқов устидан бош вазир Абдулла Ариповга шикоят қилган эди. Мурожаатчилар Фирдавс Абдухолиқов кинематография соҳасини ривожланиш бўйича комплекс ёндашув ва концептуал қарорларни қабул қилиш ўрнига соҳани ривожлантиришга мутлақо алоқадор бўлмаган фаолият билан шуғулланиб келаётгани, кўп йиллик тажрибага эга ходимларни четлатиб, уларнинг ўрнига кино соҳасидан йироқ бўлган, унинг ўзигагина қарашли одамларни бошқарма ва бўлимлар раҳбарлигига тайинлаш амалиёти йўлга қўйилганини таъкидлаганди.
Фирдавс Абдухолиқов 1992—1995 йилларда Ўзбекистондаги дастлабки хусусий телеканаллардан бири — “STV” ва илк нодавлат газеталардан бири — “Даракчи”га асос солган. У узоқ йиллар давомида Ўзбекистон Электрон оммавий ахборот воситалари миллий ассоциациясига раҳбарлик қилган.
Абдухолиқов 2019 йил сентябрида ўша вақтдаги “Ўзбеккино”га раҳбар этиб тайинланган эди.
Шуҳрат Ризаев эса бугунга қадар агентлик раҳбари ўринбосари лавозимида ишлаб келаётган эди. У агентликка вақтинча раҳбар бўлади.
Изоҳ (0)