Хоразм вилоятининг Боғот туманидаги уйлардан бирига астероид тушгани ҳақида хабарлар тарқалди. Вилоят ФВБ матбуот хизмати бу хабар нотоғри эканлигини билдирди.
Маълум қилинишича, 12 май куни соат 03:39 да Хоразм вилояти ФВБга Боғот тумани Обод Ватан кўчасидаги уй даҳлизининг тахминан 10 квадрат метр том қисми қулаб тушгани тўгрисида хабар келиб тушган.
“Мазкур ҳолат юзасидан ижтимоий тармоқларда турли асоссиз ва ҳақиқатга тўғри келмайдиган маълумотлар, хусусан, ҳодиса жойига астероид тушгани ҳақида нотўғри хабарлар тарқалмоқда. Шуни маълум қиламизки, ҳодиса содир бўлган манзилда Ички ишлар бошқармаси ҳамда Фавқулодда вазиятлар бошқармасининг махсус лаборатория хизматлари томонидан ўрганиш ишлари олиб борилган. Ўрганишлар давомида ҳодиса жойида ҳеч қандай фазо жисмлари ёки портлаш хусусиятига эга мосламаларнинг қолдиқлари аниқланмаган”, дейилади хабарда.
Ўрганишлар давомида хонадонда 2 та пропан газ баллони мавжудлиги аниқланган.
Ҳозирда ҳодиса юзасидан терговга қадар суриштирув ишлари олиб борилмоқда. Ҳодисанинг келиб чиқиш сабабини аниқлаш мақсадида махсус экспертиза тайинланган.
Мазкур ҳодиса оқибатида тан жароҳати олганлар йўқ.
Изоҳ (0)