Ўзбекистондаги 12 та боғчада Кокоро лингуа платформаси ёрдамида француз тилини ўқитиш йўлга қўйилади. Бу ҳақда Мактабгача ва мактаб таълими вазирлиги хабар берди.
Ҳилола Умарова Францияда бўлиб ўтган Халқаро Франкофония ташкилотининг 19-саммитида иштирок этгани ҳақида маълум қилинган эди. Саммит доирасида вазир ва Кокоро лингуа компанияси асосчиси Натали Ласслет ўртасида учрашув бўлиб ўтди.
Ўзбекистоннинг Франциядаги элчихонаси кўмагида ташкил этилган ушбу учрашувда томонлар Ўзбекистондаги мактабгача таълим ташкилотларида 5-6 ёшли болалар учун инновацион Кокоро лингуа платформаси ёрдамида болаларга француз тилини ўргатиш масалаларини муҳокама қилди.
Муҳокамалар якунида келгуси бир йил давомида 12 та мактабгача таълим ташкилотларида бепул тарзда француз тилини ўқитиш бўйича келишув имзоланди.
Кокоро лингуа — болалар учун тил ўргатиш бўйича инновацион платформа ҳисобланади. Унда болаларга чет тилини қизиқарли усуллар билан асосан, видеолар орқали 12 ой ичида кундалик мулоқотда фойдаланиладиган 250 та сўз ва ибораларни ўрганиш имконини беради. Кокоро Лингуа орқали бугунги кунда 500 мингдан ортиқ болага тил ўргатишда фойдаланилди.
Учрашувлар давомида Ҳилола Умарова France Education International ташкилоти бош директори Оливье Брандуи билан ҳам учрашган. Унда француз томони билан Ўзбекистондаги француз тили ўқитувчиларини малакасини ошириш ва тренер ўқитувчиларини тайёрлаш, ўқитувчилар алмашув дастурини жорий қилиш ҳамда Ўзбекистонда француз тили тестларини (DELF жуниор, DALF) жорий қилиш масалалари юзасидан келишувга эришилди.
France Education International 1945 йилда ташкил топган бўлиб, ташкилотнинг асосий фаолият йўналишларидан бири тил бўйича сертификатлаш ва тестлар тузишдан иборат.
Изоҳ (0)