Жаҳон прогнозлаш марказларининг дастлабки ҳисоб-китобларига кўра, 2024 йилнинг март ойи нисбатан салқин бўлиши тахмин қилинмоқда, деб ёзмоқда “Ўзгидромет”.
Синоптикларнинг билдиришича, март ойида Ўзбекистонда ҳаво ҳарорати одатда тез кўтарила бошлайди. Метеорологик кузатувларнинг барча йиллари учун март ойида қайд этилган энг юқори ҳарорат қийматлари ҳудуднинг катта қисмида 30-33 даража илиқни, жанубий ҳудудларда эса 34-37 даража илиқни ташкил этади.
Бироқ март жуда мураккаб ой ҳисобланади. Ушбу ой ҳаво оқимлари йўналиши тез-тез ўзгариши билан тавсифланади. Жанубдан жуда илиқ ҳавонинг жадаллик билан кириб келиши Волгабўйи, Урал ва Ғарбий Сибир ҳудудларидан совуқ ҳаво оқими кириб келиши билан алмашади. Илиқ об-ҳаво даврлари совуқ даврлар билан алмашади, бунда ҳарорат кўпинча 0-5 даража совуққача пасаяди.
Ўзбекистонда метеорологик кузатувларнинг барча йиллари учун март ойида мутлақ минимал ҳарорат ҳудуднинг катта қисмида 15-20 даража совуқни, Қорақалпоғистон Республикаси ва Қизилқум шимолида 23-25 даражагача совуқни ташкил этади.
Ўзбекистонда март ойи — ёғингарчилик миқдори ва ёғингарчилик кузатиладиган кунлар сони бўйича йилда ёғингарчилик энг кўп бўладиган ой деб ҳисобланади. Март ойида ёғингарчилик асосан ёмғир кўринишида ёғади, аммо ҳароратнинг кескин пасайиши даврида ёмғир қорга айланиши мумкин.
2024 йилги март ойида ўртача ойлик ҳаво ҳарорати меъёрдан 1-2 даражага паст, баъзи жойларда меъёр атрофида бўлиб, 4-9 даража илиқни, жанубда 10-11 даража илиқни ташкил этади. Ой давомида ҳарорат кечалари 0-5 даража совуқдан 5-10 даража илиққача, кундуз кунлари 5-10 даража илиқдан 17-22 даража илиққача, жанубда 20-25 даража илиққача кескин ўзгариб туриши прогноз қилинмоқда.
Республика ҳудудининг катта қисмида ойлик ёғингарчилик миқдори меъёр атрофида, баъзи жойларда ундан кўп бўлиши кутилмоқда.
Изоҳ (0)