“Мендан қўрқасанми?” — собиқ МХХ биноси ҳудудидаги дарахтларни кўчириб ўтказаётган фирма раҳбари фотографнинг бошига ичимлик тўкди

Яқинда ижтимоий тармоқларда Тошкент шаҳри, Юнусобод тумани, Сайилгоҳ кўчасида эман дарахтлари кесиб олиб кетилаётгани ҳақида хабарлар тарқалганди. 

Кейинроқ Тошкент шаҳар ҳокимлиги ва Экология вазирлиги дарахтлар кесилмаганини, балки кўчириб ўтказилаётганини маълум қилганди. Ҳокимлик ва вазирлик “трансплантация”ни амалга оширган Muna Mag компанияси раҳбари Фаррух Ҳакимовни мақташ билан овора бўлиб, уни зўр йигит ва инноватор эканлигини эътироф этган эди.

Пойтахт фотографи Камил Еникеев кўчириб ўтказилган чинорларни ўз кўзи билан кўриш учун борди. Ва у ерда Фаррух Ҳакимовга дуч келди.

Бу видеони, албатта, кўринг. Бизнинг давлат идораларимиз кимнинг ёрдами билан “кўчириб ўтказиш” деб аталадиган ишларни амалга ошираётганига боқинг. Ҳокимлик, Экология, атроф-муҳитни муҳофаза қилиш ва иқлим ўзгариши вазирлиги, ҳуқуқ-тартибот идоралари ўз фикр-мулоҳазаларини билдиришларига ёки иш очишларига чин дилдан умид қиламан, — дейилади блогер Никита Макаренко хабарида.

Қўшимча қилинишича, Экология вазирлиги баёнот билан чиқиб, қуйидагиларни маълум қилган:

Собиқ Давлат хавфсизлик хизмати биноси ўрнида Radisson меҳмонхонаси қурилиши учун дарахтларни кўчириб ўтказиш ноқонуний бўлган. Шаҳар Экология бошқармаси бошлиғи Турсунпўлат Эгамов компания ҳеч қандай ташкилотдан рухсат олмасдан дарахтларни кўчириб ўтказишга киришганини тасдиқлади.