Жанубий Корея “тарихий қарзи” туфайли АҚШ божларига қаршилик кўрсата олмайди

Жанубий Корея мамлакатнинг АҚШ олдидаги тарихий қарзи туфайли Дональд Трамп томонидан жорий этилган божларга қаршилик кўрсатмайди, деди амалдаги президент Хан Док Су Financial Times нашрига.

Унинг сўзларига кўра, Кореянинг бугунги даражага етишишида АҚШ жуда катта рол ўйнайди. Корея уруши вайронагарчилигидан сўнг АҚШ бизга технология, сармоя ва хавфсизлик соҳаларида ёрдам қўлини чўзди. Бу эса Жанубий Кореяни хорижликлар учун жуда қулай инвестиция муҳитига айлантиришга ёрдам берди, дея қўшимча қилиб ўтди.

Пезидентга кўра, Сеул ушбу “миннатдорлик қарзи” фонида иккала томонга ҳам фойда келтирадиган ечимлар топиш учун Трамп билан музокаралар олиб боришни афзал кўрмоқда.

Financial Times нашрининг ёзишича, Жанубий Корея расмийлари Трамп икки давлат ўртасидаги эркин савдо келишувига қарамай 25 фоизлик божларни эълон қилганида даҳшатга тушишган. Лекин улар бунга жавобан Америка товарларига қарши амалда ҳеч қандай бож жорий этмади.

Шу билан бирга, Хан Дук Су Сеул Вашингтон билан “тарифсиз савдо тўсиқлари”, жумладан, дори-дармонларнинг шаффоф бўлмаган нархлари, баъзи Америка мол гўштини импорт қилишдан бош тортиш ва Netflix каби Америка контент провайдерларининг тармоқ тўловларини муҳокама қилишга тайёрлигини айтиб ўтди.

2 апрель куни Дональд Трамп “Америка озодлик куни” доирасида дунёнинг аксарият давлатларига божлар киритилишини эълон қилди ва шу билан савдо урушини бошлаб юборди. Бир неча марта оширилган энг йирик божлар Хитойга қаратилди — уларнинг умумий ҳажми 145 фоизга етди.

Трампнинг тарифларни эълон қилиши Осиё фонд биржаларида ваҳима уйғотди. Осиё-Тинч океани минтақасидаги 13 мамлакатнинг йирик ва ўрта компанияларини ўз ичига олган MSCI Asia Pacific индекси 7 апрелдаги савдолар чоғида 7 фоиздан кўпроққа тушиб кетди. Бу индекс учун 2008 йилдан бери бўлган энг ёмон кун бўлди.

Бир неча кун ўтгач, Трамп АҚШ га мурожаат билан чиққан 75 дан ортиқ мамлакатлар учун тарифлар оширилишини 90 кунга музлатилишини эълон қилди. Илгари жорий этилган 10 фоизлик базавий ставкали тарифлар ушбу даврда ҳам бу мамлакатлар учун амалда бўлади.

Япония аллақачон Трамп билан божлар бўйича музокараларни бошлаган ва АҚШ президентининг ўзи бу мулоқот ижобий кетаётганлигини таъкидлаган.