“Дарё” нашрига Тошкент шаҳри Яшнобод тумани 153-мактаб олдидаги дарахтлар кесиб ташлангани ҳақида мурожаат келиб тушган эди. Юборилган фотосуратлардан аён бўладики, бир-нечта дарахтлар тагидан кесиб ташланган.
Ҳолат юзасидан, Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси ахборот хизматининг “Дарё”га маълум қилинишича ҳақиқатан ҳам 2 туп дарахт кесилган ва 10 туп дарахт тепа қисмидан буталанган.
Кўрсатилган манзилдаги дарахтлар Тошкент шаҳар Экология, атроф-муҳитни муҳофаза қилиш ва иқлим ўзгариши бошқармасининг Яшнобод тумани инспекторлари томонидан жойга чиқиб ўрганиш ишлари олиб борилганда, табиий омиллар ва зараркунандалар — “шаҳар мўйловдори” қурти билан зарарлангани ва қуригани аниқланган, — дейилади бошқарма ахборотида.
Юқоридаги ҳолат “Ўсимлик дунёсини муҳофаза қилиш ва ундан фойдаланиш тўғрисида”ги қонунининг 37-моддасига (дарахтлар ва буталарни кесиш) асосан санитария мақсадида кесилган.
Маълумот учун, 37-модда— дарахтлар ва буталарни кесиш
Давлат ўрмон фонди ерларидаги дарахтлар ва буталарни кесиш ўрмонни парвариш қилиш учун кесиш қоидаларига мувофиқ, ўрмонларнинг қўриқланиш тоифалари ҳисобга олинган ҳолда берилган ўрмон билетлари бўйича амалга оширилади.
Давлат ўрмон фондига кирмайдиган дарахтлар ва буталарни кесишга фақат санитария мақсадларида кесиш ҳамда биноларни, иншоотларни ва коммуникацияларни қуриш ҳамда реконструкция қилиш билан боғлиқ ҳолда кесиш тартибида, маҳаллий давлат ҳокимияти органларининг экология ва атроф-муҳитни муҳофаза қилиш органлари билан келишилган қарорига кўра йўл қўйилади.
Табиий омиллар ёки ўсимликлар зараркунандалари, касалликлари таъсирида зарарланган, қуриётган ёки қуриб қолган, шунингдек инсоннинг ҳаёти ва соғлиғи, юридик ва жисмоний шахсларнинг мол-мулки хавфсизлигига таҳдид солаётган дарахтлар ва буталарни кесиш маҳаллий давлат ҳокимияти органларининг экология ва атроф-муҳитни муҳофаза қилиш органлари билан келишилган қарорига кўра ҳақ тўламасдан амалга оширилади.
Изоҳ (0)