“Crocus’даги теракт Тожикистон имижига жиддий путур етказди” — Эмомали Раҳмон

Тожикистон президенти Эмомали Раҳмон 9 май куни россиялик ҳамкасби Владимир Путин билан суҳбатда Crocus City Hall’да март ойида содир бўлган теракт ўз мамлакати обрўсига жиддий путур етказганини айтди. Бу ҳақда Кремль сайтида хабар берилди.

Раҳмоннинг сўзларига кўра, терроризмга қарши “ҳар жойда биргаликда курашиш керак”. 

Икки мамлакат разведка хизмати ўтган йилларда яхши ишлаган, аммо афсуски, Crocus City Hall’да фожиа юз берди, — деган Тожикистон президенти.

У Тожикистон 30 йилдан ортиқ терроризм ва экстремизмга қарши курашиб келаётгани ва бу муаммони бевосита билишини таъкидлади.

Бу глобал муаммо. Тожиклар қадимий тарих, маданият ва цивилизацияга эга қадимий халқдир. Бўлиб ўтган воқеани, албатта, биз учун мутлақо қабул қилиб бўлмайди. Бу халқимизнинг имижига, тарихига, маданиятига, урф-одатларига жиддий путур етказади. Бу борада сиз билан яқиндан ҳамкорлик қилишда давом этамиз, — деди у.

Шунингдек, Раҳмон республика терроризм ва экстремизмга қарши курашда икки томонлама стандартларга қарши эканини айтди.

Терроризм ва экстремизмга қарши курашга келсак, сиз бизнинг позициямизни 30 йилдан бери биласиз. Позициямиз шундай: терроризм ва экстремизмга қарши курашда икки томонлама стандартларга қаршимиз. Терроризмнинг миллати ҳам, дини ҳам йўқ, — деди президент.

Шунингдек, Раҳмон гарчи давлатлар ўртасида “душманлар нифоқ солишни” хоҳласа ҳам Россия Тожикистон учун “стратегик шерик ва иттифоқчи” эканини айтди ва Путинни меҳнат муҳожирлари масаласини муҳокама қилишга таклиф қилиб, бу мавзуни нозик деб атади.

Бу биз учун жуда нозик ва асосий масалалардан бири, чунки Тожикистонда демографик даража — ҳар йили аҳоли сони 2,5 баробар ўсади. Мамлакат совет армиясини қурилиш батальонлари билан таъминлаган собиқ иттифоқ республикаларидан бири эди. Тожикистонликлар барча комсомол қурилишларида ва йирик қурилишларда қатнашган ва ҳозирда ҳам, айниқса қурилишда фаолият юритмоқда, — деди у.

Путин, ўз навбатида, Россия ва Тожикистон разведка хизматлари умумий таҳдидларни, жумладан, терроризмни тўхтатиш учун фаол ишлаётганини билдирди.

Бу иш яхши йўлга қўйилган, ҳамкасблар бир-бири билан яқин алоқада. Сиз ва мен буни қўллаб-қувватлаймиз ва давом этамиз, — деди у.

Путин Crocus’даги терактдан сўнг Раҳмонга “ҳамдардлик учун” миннатдорлик билдирди.