“Италиядаги супервулқон глобал ҳалокатга олиб келиши мумкин” — олимлар

Италиянинг Кампи-Флегрей супервулқони ҳудудида сейсмик фаолликнинг кучайиши олимларни хавотирга солмоқда. Бу ҳақда Daily Mail хабар берди.

Сўнгги олти ой ичида бу ҳудудда 3000 дан ортиқ зилзила қайд этилган, 2025 йил май ойида эса сўнгги 40 йилдаги энг кучли 4,4 магнитудали силкиниш содир бўлган. Кампи-Флегрей қадимги вулқон отилишлар натижасида ҳосил бўлган кенг калдерадир. Вулқон охирги марта 1539 йилда фаоллик кўрсатган.

Олимлар огоҳлантиришича, супервулқоннинг уйғониши глобал ҳалокатли оқибатларга олиб келиши мумкин. Бунинг оқибатида сайёра “хаосга тушади”. Тўғридан-тўғри хавф зонасида 4 миллиондан ортиқ одам, жумладан, Неапол аҳолиси қолиши мумкин.

Кул чиқиндилари Европанинг катта қисмини қоплаши мумкин, бу эса авиарейсларнинг оммавий бекор қилинишига ва ҳаво алоқасининг издан чиқишига сабаб бўлади. Бундан ташқари, атмосферага чиқариладиган моддалар қуёш нурини тўсиб қўйиши натижасида бутун дунё бўйлаб совуқ ва иқлим ҳалокатларини келтириб чиқариши кутилмоқда.

Вулқоншунослар ҳозирги фаоллик муқаррар фалокатни англатмаслигини таъкидлаган. Уларнинг ҳисоб-китобларига кўра, жорий ўн йилликда кучли отилиш эҳтимоли 1-3 фоиздан ошмайди. Бироқ, ушбу улкан вулқон фаолиятидаги энг кичик ўзгаришлар ҳам глобал оқибатларга олиб келиши мумкин. Шу сабабли бу олимлар ва ҳукумат вакилларидан жиддий эътиборни талаб қилади.