Кинода актёрларни дублёрлар алмаштириши одатий ҳол. Аммо баъзида бу вазифани махсус танланган мутахассислар эмас, балки актёрларнинг ўз укаси, синглиси ёки эгизаги бажаради. Улар шунчалик ўхшашки, камера қаршисида ким кимлигини ажратиш қийин. Айрим ҳолларда эса томошабин буни бутунлай сезмайди ҳам.
Пенелопа Крузнинг синглиси “Кариб денгизи қароқчилари” фильмида унинг дублёри бўлган
Актриса Пенелопа Круз “Кариб денгизи қароқчилари: Ғариб соҳилларда” фильми суратга олинаётганида ҳомиладор эди. Шу сабабли режиссёр ноодатий, аммо самарали ечим топиб, жанговар саҳналар учун актрисанинг синглиси Моника Крузни жалб этди. Улар бир-бирига шу даражада ўхшайдики, бу фактни билмаган томошабин экранда ҳеч қандай фарқни сезмайди.
Крис Хемсворт ягона Тор эмас эди
Хемсвортлар оиласидаги уч ака-ука Люк, Крис ва Лиам актёрлик фаолияти билан шуғулланади. Marvel кино оламидаги Тор образида уларнинг ҳар бири муайян тарзда иштирок этган. Дастлаб Лиам бу ролга кастингда қатнашган, кейинчалик эса “Тор: Рагнарёк” фильмида Люк Хемсворт Тор образида чиққан. У фильмдаги кичик саҳналардан бирида акаси Криснинг ўрнини эгаллаган.
Линда Хемилтоннинг эгизак синглиси “Терминатор 2” фильмида Сара Конорни ўйнаган
“Терминатор 2: Қиёмат куни” фильмида Сара Конорнинг бир кадрда икки киши шаклида пайдо бўладиган саҳна мавжуд. Бу саҳнада ҳақиқий Сара Конор образини Линда Хемилтон ўйнаган бўлса, унинг “сохта” нусхаси ролини актрисанинг эгизак синглиси Лесли ижро этган.
Рами Малек укаси билан бир фильмда рол ўйнаган
Машҳур актёр Рами Малек ва унинг эгизак укаси Сами Малек ташқи кўриниш жиҳатдан бир-бирига жуда ўхшаш. Улар “Бастернинг ёмон юраги” фильмида бирга суратга тушган. Рами ҳатто ҳазиллашиб: “Биз шунчалик ўхшашмизки, ота-онамиз ким кимлигини фарқлай олмай қолган бўлса ажаб эмас,” деган.
Жилл Хенесси “Қонун ва тартиб” сериалидаги ролини синглисига топширган
Актриса Жилл Хенесси “Қонун ва тартиб” сериалининг 4-6-мавсумларида прокурор ёрдамчиси Клер Кинкейд образини ижро этган. Аммо бир сафар бошқа лойиҳалар билан банд бўлиб, суратга олишларда қатнаша олмаган. Ўшанда уни эгизак синглиси Жаклин Хенесси ўрнига рол ижро этган.
“Баффи — вампирлар овчиси” сериалида Николас Брендоннинг укаси актёрга дублёрлик қилган
Николас Брендон мазкур лойиҳада Ксандер исмли қаҳрамон ролини ижро этган. Сериалнинг учинчи мавсумида эса эгизак укаси Келли Донован суратга тушган. У шунингдек, Николас соғлиғи ёмонлашган пайтларда уни суратга олиш майдонида тез-тез акаси ўрнига ишлаб кетган.
Изоҳ (0)