АҚШ Демократик ва Республикачилар партияси сенаторлари шу ҳафта Хитойга нисбатан босимни кучайтириш мақсадида учта қонун лойиҳасини тақдим этмоқда. Бу ҳақда Reuters агентлиги хабар бермоқда.
“АҚШ Хитой Халқ Республикаси ва унинг бутун дунё бўйлаб кўрсатаётган тажовузкорлиги олдида ўзининг заифлигини намоён қила олмайди”, дейди Орегон штатидан демократ сенатор Жефф Меркли.
Қонун лойиҳаларидан бирида “уйғурларни мажбурий равишда ватанига қайтаришда айбдор деб топилган” Хитойнинг ҳозирги ва собиқ расмий шахсларига АҚШга киришни тақиқлаш таклиф қилинмоқда. Яна бир қонун лойиҳаси эса “Тайван билан расмий дипломатик алоқаларни сақлаб келаётган” Лотин Америкаси ва Кариб ҳавзаси мамлакатларини қўллаб-қувватлашга ҳамда “Тайбей билан ҳамкорликни янада чуқурлаштириш бўйича бошқа қадамлар”га қаратилган. Учинчи ҳужжат эса “халқаро миқёсдаги қатағонларга қарши курашга йўналтирилган”.
Маълум қилинишича, Қўшма Штатлар ва Хитой келаси ҳафта бошида Стокгольмда савдо бўйича амалдаги келишувларни узайтириш масаласини муҳокама қилади.
“АҚШ президенти Дональд Трампнинг савдо масалаларига эътибор қаратиш истаги Конгрессдаги ‘лочинлар’ орасида ташвиш уйғотди. Улар хавфсизлик мавзусига камроқ эътибор берилишидан хавотирда”, деб ёзмоқда Reuters.
АҚШ ва Хитой савдо уруши
2 апрель куни АҚШ президенти Дональд Трамп барча давлатлар учун 10 фоизлик асосий тарифларни жорий қилди. Аммо божлар ҳар бир давлатнинг савдо балансига қараб ўзгарди. Хитой билан савдода йирик дефицит мавжудлиги боис АҚШ бу мамлакат учун тарифларни анча юқори даражага кўтариб, 34 фоизга етказди.
Бунга жавобан Пекин ҳам шунча миқдорда Америка товарларига божлар солди. Шундан сўнг Трамп агар Пекин жавоб чораларидан воз кечмаса, божларни 50 фоизгача ошириш билан таҳдид қилди. Шу сабабли божлар 104 фоизга ошди. Натижада Хитой Америка маҳсулотлари учун божларни 84 фоизга оширишини эълон қилди. Мазкур эълон ортидан Трамп Пекин учун тарифлар 125 фоизга чиқишини айтди, кейинчалик буни 145 фоизга оширди.
Хитой мазкур тарифларга жавобан ставкани 125 фоизга кўтарди. Хитой АҚШни “ўзаро божлар”ни бекор қилишга ва ўзининг нотўғри амалиётини тузатишга чақирди. ХХР раиси Си Цзиньпин ҳеч бир давлат “бож уруши”дан ютмаслигини қайд этди. Шундан сўнг иккала давлат савдо музокараларини бошлаганди.
Изоҳ (0)