Шавкат Мирзиёев 20 ноябрь куни Қонунчилик палатаси мажлисида Қозоғистон ва Тожикистонга ҳам ID-карта орқали ўтиш имконияти яратилишини маълум қилди.
“Ҳозирги вақтда фуқароларимиз Қирғизистонга ID-карта билан бемалол бориб-келмоқда. Энди шундай тартибни Қозоғистон ва Тожикистон билан ҳам жорий этиш режалаштирилган”, деди президент.
Давлат раҳбари Ўзбекистонни ҳар томонлама ривожлантириш учун самарали ташқи сиёсат олиб бориш, дўст ва ҳамкорлар доирасини кенгайтириш, яқин қўшнилар билан минтақавий ҳамкорликни чуқурлаштириш ўта муҳим вазифа эканлигини айтди. Шу мақсадда президент Ташқи сиёсат концепциясини янги таҳрирда қабул қилиш зарурлигини таъкидлади.
Қайд этилишича, Марказий Осиё давлатлари ўртасида яхши қўшничилик муносабатларини янада мустаҳкамлаш, минтақавий хавфсизлик ва барқарорликни таъминлаш ташқи сиёсатда устувор йўналиш бўлиб қолади. Келгуси йили юртимизда бўлиб ўтадиган “Марказий Осиё бешлиги” учрашуви шу йўлдаги яна бир улкан амалий қадам бўлади.
Шавкат Мирзиёев 2024 йил 9 август куни Марказий Осиё давлатлари раҳбарлари Маслаҳат учрашувида Марказий Осиё мамлакатлари миллий ID-карталарини ўзаро тан олиш таклифини илгари сурган. Президент туристик алмашувни кенгайтириш мақсадида “Битта тур — бутун минтақа” тамойили бўйича миллий ID-карталарни ўзаро тан олиш ва оммавий туристик маҳсулотларни ишлаб чиқиш масалаларини ўрганиб чиқишни таклиф қилганди.
2023 йил 1 сентябрдан бошлаб ички ҳужжат — фуқаро ID-картасини тақдим этган ҳолда Ўзбекистон—Қирғизистон чегарасини кесиб ўтиш тартиби амал қилиб келмоқда. Ўзбекистон—Қирғизистон фуқаролари учун Давлат чегарасини кесиб ўтишнинг соддалаштирилган ягона тартибига кўра, икки давлат фуқаролари 60 кунгача идентификация ID-картаси билан икки давлат ҳудудларига киришлари, ҳаракатланишлари ва унда бўлиб туришлари мумкин.
Изоҳ (0)