Жорий йил I ярмида ўтган йилнинг мос давридагидан 16,8 трлн сўм кўпроқ солиқ йиғилди. Бу ҳақда Солиқ қўмитаси ҳисоботида маълумот берилган.
2025 йил янар—июнь ойларида Ўзбекистон бюджетига солиқ тушумлари миқдори 102,6 трлн сўмни ташкил этди. Мазкур кўрсаткич 2024 йил мос даврига (85,8 трлн сўм) нисбатан 20 фоизга кўп.
“Ҳар бир нафар ходимга 2024 йил I ярим йилликда ўртача 9,3 млрд сўмдан солиқ тушуми тўғри келган бўлса, жорий йилда ушбу кўрсаткич +1,8 млрд сўмга (20 фоиз) ортиб, 11,2 млрд сўмга етди”, дея қайд этган манба.
Мамлакат ҳудудлари кесимида энг кўп солиқ тушуми Тошкент шаҳрида қайд этилган —17,6 трлн сўм. Бу ўтган йил мос дарвидагидан 31,4 фоизга кўп. Шу билан бирга, Тошкент вилоятида 4,7 трлн сўм (ўсиш 25,8 фоиз), Фарғона (+24,5 фоиз) ва Самарқанд (+21,4 фоиз) вилоятларида 3,1 трлн сўмдан, бошқа ҳудудлардан сезиларли даражада юқори миқдорда тушум қилинган.
Энг кам солиқ тушумлари Сирдарё вилоятида таъминланган — 1,1 трлн сўм (ўсиш 28,3 фоиз). Ўз навбатида яна нисбатан кам солиқлар Навоийда 1,3 трлн (+22,4 фоиз) ва Жиззахда 1,3 трлн сўм (16,5 фоиз) йиғиланган.
Республика миқёсида юқори ўсиш суръати ер қаъридан фойдаланганлик учун солиқ бўйича кузатилган. Яъни мазкур турдаги солиқдан тушумлар 2024 йил I ярмидаги рақамларга қараганда 23,4 фоизга (1,9 трлн сўм) ортган. Шу билан бирга, қўшилган қиймат солиғи ҳам 20,3 фоизга (3,6 трлн сўм) кўпайди.
Солиқ турлари бўйича тушумлар ва миқдорлар ўсиши қуйидагича:
- ҚҚС — 21,4 трлн сўм;
- фойда солиғи —22,5 трлн сўм (+17,5 фоиз) ;
- даромад солиғи — 19,9 трлн сўм (+17,5 фоиз) ;
- ер қаъридан фойдаланганлик учун солиқ — 10,3 трлн сўм;
- акциз солиғи — 9,3 трлн сўм (+15,6 фоиз) ;
- ер солиғи — 4,8 трлн сўм (+18,4 фоиз) ;
- мол-мулк солиғи — 4,1 трлн сўм (+16,4 фоиз) ;
- айланмадан олинадиган солиқ —1,6 трлн сўм (+14,8 фоиз);
- сув ресурсларидан фойдаланганлик учун солиқ —0,5 трлн сўм (+7,2 фоиз).
Ярим йил мобайнида қўшилган қиймат солиғи тўловчилар сони 14,5 фоизга ўсиб, 227,9 мингтага етди. Фойда солиғи тўловчилар ҳам 14, 5 фоиз кўпайиб, 227,9 мингта бўлган.
Бироқ даромад солиғи тўловчилар жорий йил I ярмида ўтган йил мос давридагидан 0,7 фоизга (6 млн 23 мингтадан 5 млн 980 мингта қолган) камайган.
Айланмадан олинадиган солиқ тўловчилар 2024 йил I ярмидаги 344,2 тадан жорий йил июлигача 332 мингта қолган (пасайиш 35 фоиз).
Мол-мулк солиғи тўловчилар 6,3 фоиз кўпайиб, 82,6 мингтага етган.
Жорий йил дастлабки ярмида ўзини ўзи банд қилган шахслар сони ўтган йил мос давридагидан 56 фоизга кўпайди. Яъни 2024 йил дастлабки олти ойида улар сони 3,55 млн нафар бўлган, жорий йил I ярмида 5,54 млн нафарга етди.
Изоҳ (0)