Ўзбекистонда тадбиркорларга бериладиган микрокредитлар миқдори 3 карра оширилиб, 300 миллион сўмга етказилади. Бу ҳақда Шавкат Мирзиёев Нукусда тадбиркорлар билан очиқ мулоқотда маълум қилди.
Қайд этилишича, президент тадбиркорлик учун қўшимча шароитлар яратишда кичик ва ўрта бизнесдаги молиявий ресурсларни кўпайтириш ташаббусларни илгари сурди.
2023 йилда кичик ва ўрта бизнесни молиявий қўллаб-қувватлаш учун янги тизим жорий қилинган эди. Бу борада Бизнесни ривожлантириш банки ва Тадбиркорликни ривожлантириш компанияси ташкил этилиб, йил бошидан 35 мингдан ортиқ тадбиркорларга жами 3,5 триллион сўм микрокредитлар ажратилди. Бундан ташқари, “Бизнесга биринчи қадам” дастури бўйича тадбиркорликни энди бошлаётган 115 минг аҳолига 1 триллион сўмлик микроқарзлар берилди. Ушбу тажриба янада кенгайтирилиши белгиланди.
Президентнинг қайд этишича, 100 миллион сўмгача микрокредит бор-йўғи 9 фоиз тадбиркорларнинг эҳтиёжи учун етарли эканлиги маълум бўлди. Шу боис, микрокредитлар миқдори 300 миллион сўмга етказилади. Бунда кредитнинг 100 миллион сўмгача бўлган қисмига гаров талаб қилинмайди.
Бу мақсадга бир йилда 10 триллион сўм берилади.
Эндиликда кичик ва ўрта бизнесни қўллаб-қувватлашда барча банклар ва микромолия ташкилотлари иштирок этиши мумкин бўлади.
-Lp-2fqUV.jpg)
Энди Тадбиркорлик компаниясининг филиали ҳар бир вилоятда ташкил қилинади. Компания ва унинг филиаллари ҳудудларда салоҳияти бор тадбиркорларни аниқлайди.
Компания кафилликлари яхши кредит тарихи ва юқори барқарорлик рейтингига эга тадбиркорларга берилади.
Изоҳ (0)