Рақобат қўмитаси “Лукойл” компаниясига нарх манипуляцияси орқали асоссиз олинган маблағни қайтариш мажбуриятини қўйганди. Компаниянинг “Дарё” сўровига жавобан маълум қилишича, қўмитанинг бу борадаги қарори устидан шикоят қилмоқчи.
Июль ойининг бошларида қўмита Lukoil Overseas Supply and Trading Ltd компаниясига нисбатан “Рақобат тўғрисида”ги қонун ва ҳукумат қарори билан тасдиқланган низом талаблари бузилиши аломатлари бўйича иш қўзғатганди.
Қўмита берган маълумотга кўра, Lukoil Overseas Supply and Trading Ltd компаниясининг биржа савдолари орқали техник олтингугурт маҳсулотини реализация қилишда, шу жумладан, биржа савдоларида маҳсулот ҳажмларини номувофиқ қўйиш каби манипуляция ҳолатлари орқали маҳсулот нархларининг ошишига олиб келган ҳаракатларининг аломатлари аниқланган.
Натижада биржа савдоларида техник олтингугурт маҳсулоти нархлари ўртача 10 фоиздан 50 фоизгача ошишига сабаб бўлган.
18 июль куни ушбу иш юзасидан қўмитанинг Махсус комиссияси Lukoil Overseas Supply and Trading Ltd компаниясига “Рақобат тўғрисида”ги қонун ҳамда “Биржа савдоларида юқори ликвидли ва (ёки) монопол турдаги маҳсулотларни сотиш тартиби тўғрисида”ги низом талабларининг бузилишига йўл қўйилгани натижасида асоссиз олинган маблағни қайтариш бўйича қарор қабул қилди.
Компанияга қонунбузилишларни бартараф этиш ва кейинчалик йўл қўймаслик юзасидан бажарилиши мажбурий бўлган кўрсатма берилганди. Шунингдек, махсус комиссиянинг ушбу қароридан норози бўлган тақдирда қўмитанинг Апелляция кенгашига ёки судга мурожаат қилиш ҳуқуқига эгалигини маълум қилганди.
Компаниянинг “Дарё”га билдиришича, Lukoil Overseas Supply and Trading Ltd монополияга қарши курашиш борасидаги Ўзбекистон қонунчилигига зид бўлгани сабабли қўмитанинг важлари ва хулосаларига қўшилмайди. Рақобатни ривожлантириш ва истеъмолчилар ҳуқуқларини ҳимоя қилиш қўмитаси қарори устидан қонунчиликда белгиланган тартибда шикоят қилинади.
Изоҳ (0)