Ўзбекистон иқтисодий кўрсаткичлари Қозоғистонникига етиб олиши мураккаб масала. Бу ҳақда иқтисодчи Беҳзод Ҳошимов YouTubeʼдаги Cаctuz подкастида фикр билдирди.
Беҳзод Ҳошимовнинг айтишича, ривожланган ва камбағал давлатлар иқтисодий ўсиши ўртасида муҳим тафовут мавжуд.
“Масалан, АҚШда ялпи ички маҳсулот аҳоли жон бошига 76 минг доллар. Шундан икки фоизи 1,5 минг доллар. Ўзбекистонда эса жон бошига 3 минг доллар. Бунинг 5 фоизи 150 доллар. Шунда ўртача ўзбекистонлик бир йилдан кейин бор-йўғи 150 долларга бойийди. Йилига 3 минг доллардан бойиш билан 76 минг доллардан бойиш ўртасида кескин фарқ бор ва катта миқдорда иқтисодий ўсиш анча қийин”, деди мутахассис.
Иқтисодчи фикрича, Ўзбекистон йилига 5 фоизлик иқтисодий ўсиш билан юқори натижага эришиши қийин. Мамлакат иқтисодиёти камида 8 фоиздан ўсиши зарур.
“Шунда, тахминан, 30 йилдан кейин Қозоғистонга етиб олишимиз мумкин. Қозоғистонда аҳоли жон бошига даромад бизникидан 5-6 баробар баланд. Биз шу даражада камбағалмизки, даромадимиз олти баробарга ошса, яъни ҳар бир ўзбекистонликники шунча кўтарилса, кейин Қозоғистонга етиб борамиз. Киши бошига ялпи ички маҳсулотимиз 10 йил давомида 5 фоиздан ўсиб борса ҳам, Қозоғистонга етиб олишимиз амримаҳол. Ўзбекистон ҳатто дунёдаги ўртача даромади бор мамлакатлар қаторига киришида анча шубҳа мавжуд. Биринчидан, доимий равишда 5 фоиз иқтисодий ўсишнинг ўзи шубҳали”, деди Беҳзод Ҳошимов.
2024 йилда Қозоғистон ялпи ички маҳсулоти 288 миллиард долларни ташкил этган. Бу аҳоли жон бошига 14 минг доллардан кўпроққа тўғри келади. Ўтган йили мамлакат аҳолиси сони 20 миллион 265 минг кишига етган.
2024 йилда Ўзбекистон ялпи ички маҳсулоти ҳажми 115 миллирд долларга баҳоланган. Бу миқдор аҳоли жон бошига 3 минг 92 доллардан тўғри келади. Мазкур рақам республиканинг ўтган йилдаги жами аҳолиси сони — 37,2 миллион кишига нисбатан ҳисобланган.
Изоҳ (0)