Ўзбекистонда дизель ишлаб чиқувчи бир неча корхоналар мавжуд бўлса–да, маҳсулот импорти йилдан йилга ошиб бормоқда. Буни охирги уч йиллик рақамларда кўриш мумкин.
Божхона қўмитаси жорий йил август ойидан 722 турдаги истеъмол товарлари импорти бўйича онлайн маълумот бера бошлади. Қўмита веб–сайтида ёқилғи–энергетика ва нефть маҳсулотлари импорти бўйича ҳам статистик рақамлар келтирилган. Платформада сўнги уч йилда мамлакатга хориждан дизель ёнилғиси олиб келиш ҳажми етти баравар ошгани маълум қилинган. Хусусан, 2024 йил январь–июль ойларида мамлакатга жами қиймати 168,6 миллион долларлик 206,9 миллион тонна дизель импорт бўлган.
Ўтган 2023 йилнинг дастлабки етти ойида хориждан 137,5 миллион долларлик 169 тонна, 2022 йилнинг мос даврида 23,7 миллион долларлик 28,2 миллион тонна дизель сотиб олинган. Яъни жорий йил бошидан июлгача бўлган даврда 2022 йил январь–июль ойларидагидан етти карра кўпроқ дизель импорти амалга оширилган.
Республикада дизель маҳсулоти 2022 йилда иш бошлаган, лойиҳа қиймати 3,6 миллиард долларлик Uzbekistan GTL заводида, шунингдек, Бухоро ва Фарғона нефтни қайта ишлаш заводларида ишлаб чиқарилади.
Бундан бир йил илгари журналистлар билан мулоқотда “Ўзбекнефтгаз” АЖ бошқарув раиси Баҳодир Сиддиқов Uzbekistan GTL заводида асосан дизель ишлаб чиқарилаётганини айтганди. Компания раҳбари ўз сўзида завод Ўзбекистонни дизелга бўлган эҳтиёжини тўлақонли қоплай олишини таъкидлаган.
“Бир тонна ҳам импорт қилмасдан мамлакатни дизель маҳсулоти билан қоплашга имкониятимиз бор. Яқинда дизель нархларини ҳам туширдик. Завод дастлабки очилганида дизель нархининг тоннаси 15–16 миллион сўм эди, ҳозир эса 9 миллион 600 минг сўмгача пасайтирилди. Ҳозирги кунда биз импортга ҳам тўлиқ рақобатбардош бўлдик”,—деган давлат корхонаси масъули.
Баҳодир Сиддиқов фикрини давом эттириб, “Ўзбекнефтгаз”га қарашли Uzbekistan GTL заводи учун қилинган харажатлар 9 йилда ўзини оқлашини айтган.
“Завод қурилиши учун 10 йиллик кредит олганмиз. Ҳам кредитларини қоплаб, 10 йилнинг ичида оёққа туриб кетиши керак. GTL 2022 йил июнда ишлашни бошлаган. Заводнинг битта линияси кунига 2 миллион долларли маҳсулот ишлаб чиқаради”,—деган “Ўзбекнефтгаз” АЖ раиси.
Статистика агентлиги маълумотларига кўра, 2024 йил январь–июль ойларида мамлакатда ишлаб чиқарилган дизель ҳажми 2023 йил мос дарвидагидан 1, 7 фоизга камайган.
Изоҳ (0)