2025/2026-ўқув йили учун давлат олий таълим муассасалари учун қабул параметрлари тасдиқланди. Бу ҳақда Олий таълим, фан ва инновациялар вазирлиги хабар берди.
Бакалаврият учун квоталар
Янги ўқув йилида давлат олийгоҳларига бакалавриат бўйича учта таълим шакли учун ўринлар ажратилади. Жумладан, мазкур йўналишнинг кундузги таълим шаклида жами 148 400 талаба ўқиш имкониятига эга бўлади. Шундан ўқитиш тиллари бўйича ўринлар қуйидагича тақсимланган:
- Ўзбек тили — 124 339 та;
- Рус тили — 19 125 та;
- Қорақалпоқ тили — 4 121 та;
- Қозоқ тили — 375 та;
- Тожик тили — 305 та;
- Қирғиз тили — 75 та;
- Туркман тили — 65 та.
Бакалавриатнинг кечки таълим шакли учун 28 732 та ўрин ажратилмоқда. Шундан ўқитиш тиллари кесимидаги тақсимот қуйидагича:
- Ўзбек тили — 25 563 та;
- Рус тили — 2 477 та;
- Қорақалпоқ тили — 437 та.
Давлат олийгоҳлари бакалавриат йўналишининг масофавий таълим шакли учун ҳам қабуллар сони ўқитиш тиллари бўйича тақсимланди. Унга кўра, мазкур таълим шакли учун жами 18 195 та ўрин берилади. Мазкур ўринларда таҳсил оладиган талабаларнинг 16 000 нафари ўзбек, 1 780 нафари рус ва 415 нафари қорақалпоқ тили ўқитилади.
Магистратура квоталари
Янги ўқув йилида давлат олийгоҳлари магистратураси кундузги таълим шакли учун 20 210 та квота ажратилди. Бунда ўзбек тилида 17 263 нафар, рус тилида 2 947 нафар талаба ўқитилади.
Магистратуранинг кечки таълим шакли учун 1 319 та ўрин ажратилади. Ўзбек тилида 1 107, русчада 138, қорқалпоқ тилида 74 талаба таҳсил олади.
Масофавий таълим шаклида жами 420 нафар магистр ўқитилади. Уларнинг 352 нафари ўзбек, 53 нафари рус, 15 нафари қорақалпоқ тилларида таҳсил олиш имконига эга.
Грантлар сони қанча?
2025/2026-ўқув йилида бакалавриат ва магистратура йўналишлари учун жами 45 422 та давлат гранти ажратилди. Шундан бакалавриатга қабул қилинган 35 500 талабанинг ўқиш харажатлари давлат бюджетидан молиялаштирилади. Магистратура бўйича ажратилган грантлар сони эса 9 922 тани ташкил этди.
Давлат томонидан юқоридагилардан ташқари яна бир неча йўналишда қўшимча грантлар ажратилади. Жумладан, хорижий ва нодавлат ОТМлар учун 1 320 та грант берилади. Хотин-қизлар учун 4 000 та, чет элдаги ўзбекистонлик ёшларга 30 та давлат гранти тақдим этилади.
Ўтган йилги квоталар қанча эди?
Жорий йилги янги ўқув даври учун кундузги таълимга аввалгидан сезиларли даражада кўпроқ ўринлар ажратилганини кўриш мумкин. Яъни мазкур шаклда 2024-2025 ўқув йили учун 127 минг 995 та квота берилган. Бу йил шунга яна 20 минг 405 та ўрин қўшилди.
Ўз навбатида ўтган йили кечки таълим шакли учун янги ўқув йилидагидан 19 минг 574 тага кам, яъни 9 минг 158 та ўрин ажратилган. Масофавий таълимга ҳам сезиларли даражада кам — 5 минг 610 та жой берилган (бу йил 12 минг 585 та ўрин қўшилди).
2024/2025 ўқув йилида жорий йилгидан фарқли равишда сиртқи таълим шакли ҳам бўлган. Мазкур тармоқ учун 52 минг 129 та жой ажратилган. Республикада ушбу таълим шакли тугатилгани сабаб, унинг квоталари бошқа йўналишларга қўшилган. Аввалроқ Олий таълим, фан ва инновациялар вазири Қўнғиротбой Шарипов ўқув сифатини етарлича таъминлаб бўлмагани туфайли сиртқи таълим тугатилганини айтганди. Вазир сиртқи ўрнига масофавий ва узайтирилган таълим кенг йўлга қўйилаётганини ҳам таъкидлаган.
Жорий йил магистратура босқичи бўйича квоталар сони оширилган. Масалан, ўтган ўқув йилида жами 17 500 магистр ўқишга қабул қилинган (бу йил 4 449 та кўп). Янги ўқув йилида магситратурага кечки ва масофавий таълим шакллари ҳам жорий этилган.
Изоҳ (0)