Россияга ишлашга кетиб, қийин аҳволга тушиб қолган ўзбекистонлик аёл ватанга қайтарилди, деб хабар бермоқда “Дунё” АА.
Қайд этилишича, мамлакатнинг Ростов-Дон шаҳридаги Бош консулхонаси кўмагида Россиянинг Краснодар ўлкасида қийин аҳволда қолган ўзбекистонлик Б.Э. Ўзбекистонга қайтарилди. У 2020 йил февраль ойида Краснодар ўлкасига ишлаш мақсадида келган ва турли мавсумий ишларда меҳнат қилган.
Бироқ кўп ўтмай коронавирус пандемияси оқибатида ишсиз ва маблағларсиз қийин аҳволга тушиб қолган. Шунингдек, у меҳнат фаолиятини амалга ошириш даврида барча ҳужжатларини йўқотган. Ўз мурожаатида ҳужжатларини расмийлаштириш ва Ўзбекистонга қайтаришда амалий кўмак сўраган.
Бош консулхона томонидан унга Ватанга қайтиш гувоҳномаси расмийлаштирилди ва Миграция агентлигининг Краснодар ўлкасидаги ваколатхонаси кўмагида авиачипта харид қилиб берилди. У куни кеча Ўзбекистонга кузатиб қўйилди.
Ўзбекистонга қайтарилаётган фуқаролар
2025 йилнинг бошларида Россиянинг Тива Республикаси Оқ Довурак шаҳрида вақтинча ишлаётган тўрт нафар Ўзбекистон фуқароси ватанга қайтарилди. Фуқароларнинг яшаш жойида содир бўлган кучли ёнғин натижасида уларнинг ҳужжатлари, шу жумладан, паспортлари йўқолган.
27 февраль куни Маккада оғир касалликка чалинган ўзбекистонлик ватанга қайтарилди. Февраль ойи охирида Россияда икки боласи билан қийин вазиятда қолган аёл Ўзбекистонга қайтарилди.
2025 йил 5 март куни Россиянинг Владивосток шаҳрида оғир тан жароҳати олган Ўзбекистон фуқароси ватанга қайтарилди. Март ойининг ўрталарида Новосибирскдаги Бош консулхонаси кўмагида Россиянинг Саха республикаси Нерюнгри шаҳрида қийин ҳаётий вазиятга тушиб қолган она ва унинг тўрт нафар фарзанди Ўзбекистонга қайтарилди. 17 март куни ота-она қарамоғисиз қолган 10 нафар вояга етмаган бола Қозоғистондан Ўзбекистонга қайтарилди. Шунингдек, Россияда ота-она қарамоғисиз қолган 30 нафар бола Ўзбекистонга қайтарилди.
14 июнь куни Туркияда ўгай отаси жинсий тажовуз қилган ўзбекистонлик қиз ватанга қайтарилди. 20 июнда эса Уммонда тутқунликда сақланган аёл болалари билан Ўзбекистонга қайтарилди.
21 июнда Эрондаги 60 га яқин Ўзбекистон фуқаролари Туркманистон орқали ватанга қайтарилган.
Изоҳ (0)