Россия пойтахти Москвада ноқонуний мигрантларни аниқлаш бўйича навбатдаги рейдлар ўтказилди. Бу ҳақда Тергов қўмитаси хабар берди.
Рейд давомида шаҳардаги хостеллар ва ибодатхоналар текширилган. Ушбу объектлардаги 500 дан ортиқ муҳожир текширув учун полицияга олиб кетилган. Россияга кириш ва мамлакатда бўлиш қоидаларини бузган 30 дан ортиқ киши маъмурий жавобгарликка тортилган ва чиқариб юборилган. Бундан ташқари, федерал қидирувда бўлган бир нафар мигрант қўлга олинган.
Тергов қўмитаси рейдлар айнан қачон ўтказилгани ва қайси давлатлар фуқаролари Россиядан чиқариб юборилганига аниқлик киритмаган.
Москвада 2024 йил 22 март куни Crocus City Hall концерт залида содир этилган теракт мигрантларга нисбатан текширув кучайишига сабаб бўлди. Россия ҳукумати бир неча Тожикистон фуқароларини теракт ташкилотчилари деб атади. Шундан сўнг бозорлар, масжидлар, ҳаммомлар ва кафеларда муҳожирларга қарши рейдлар ўтказилди. Россия Ташқи ишлар вазирлиги ҳаммомда мигрантларни калтаклаган хавфсизлик кучларини оқлаб чиқди. Вазирликка кўра, бу рейдда “режали текширув” ўтказилган ва “қонун ҳужжатларига мувофиқ” ҳаракат қилинган.
Россиядаги рейдда ўзбекистонликларга жисмоний куч ишлатилган
8 июнь куни Москвада ўтказилган рейдда меҳнат фаолиятини олиб бораётган Ўзбекистон фуқароларига нисбатан ОМОН жисмоний куч қўллаганди. Миграция агентлигининг Россиядаги ваколатхонаси жабрланганлар орасида Ўзбекистон фуқаролари бўлса, жумладан, уларга тан жароҳатлари етказилган, ҳуқуқлари бузилган ёки бошқа муаммоларга дуч келган бўлса, мурожаат қилишни сўраганди.
Муҳожирларга нисбатан шафқатсиз муносабат ортидан Ўзбекистон Ташқи ишлар вазирлиги Россияга нота юборганди. Унда ҳолатга изоҳ бериш, куч ишлатар ташкилот вакилларининг ҳаракатларига ҳуқуқий баҳо бериш сўралган.
Шундан сўнг Россия Ташқи ишлар вазирлиги вакили Мария Захарова нота диққат билан ўрганилишини айтганди. У ўзбекистонлик ҳамкорларнинг тегишли сўрови ваколатли органларга етказилганини билдирган. Олинган объектив маълумотлар белгиланган тартибда Тошкентга юборилиши таъкидланган.
2025 йил апрель ойи охирларида Россияда ўзбек мигрантлари ҳуқуқларига риоя этилиши назорати кучайтирилиши маълум қилинганди. Икки давлат Бош прокуратуралари мигрантларнинг ҳуқуқларига риоя этилиши устидан назорат ва кузатувни кучайтириш мажбуриятини олганди. Июнь ойининг ўрталарида президент Владимир Путин Россия ва Ўзбекистон миграция масалаларини биргаликда ҳал қилишга, муҳожирларни олдиндан тайёрлашга келишиб олганини айтган.
Изоҳ (0)