Самарқандда профилактика инспекторини урган шахсларга нисбатан жиноят иши қўзғатилиб, қамоққа олинди. Бу ҳақда вилоят ИИБ матбуот хизмати хабар берди.
23 июль куни соат 17:30 ларда Самарқанд шаҳар Сиёб маҳалласида яшовчи шахс “102” қисқа рақамига мурожаат қилиб, кўп қаватли уйлар олдида нотаниш фуқаролар унга тегишли Nexia-3 автомашинаси ойналарини синдириб, ўзини уриб, тан жароҳати етказганини маълум қилган.
Чақирувга асосан Оқдарё тумани ички ишлар бўлими инспектори Ў.Б. воқеа жойига етиб бориб, жанжал қилган фуқароларни “Наврўз” маҳалласида жойлашган хизмат хонасига олиб боради. Ҳолатга аниқлик киритиш мақсадида мурожаат қилган фуқаро билан суҳбатлашиб турганида ҳуқуқбузарлар — 35 ва 19 ёшли йигитлар ҳамда 45-50 ёшлар атрофидаги аёл “нима учун хизмат хонасига биринчи бизни киритмайсан, биз ҳам ‘102’ рақамига мурожаат қилганмиз”, дея жанжал кўтаради.
Инспектор ишига халал бермай туришини, навбат билан гаплашишини айтган вақтида улар ходимни ҳақоратли сўзлар билан сўкиб, хонадан чиқиб кетади. Инспектор уларга кетиб қолмаслигини, қолаверса, ҳолат бўйича тушунтириш хатлари олиши лозимлигини айтган вақтида, аёл киши келиб ходимнинг кийимидан тортиб қаттиқ ҳақоратлайди. Ғазабланган икки эркак эса шу вақтда профилактика инспекторини уриб-тепган ва йиқитиб, танасининг турли жойларига тан жароҳати етказган.
Шундан сўнг учала фуқаро ҳам ўзига тегишли бўлган автомашинага ўтириб, воқеа жойидан кетиб қолган.
Ҳолат юзасидан Оқдарё туман прокуратураси томонидан жиноят иши қўзғатилиб, ҳозирда уч нафар гумонланувчи процессуал тартибда қамоққа олинган.
Изоҳ (0)