Шавкат Мирзиёев 24 июль куни 67 ёшни қарши олганди. Президент шу муносабат билан табриклаган барчага миннатдорлик билдирди.
“Таваллуд куним муносабати билан чин дилдан қутлаб, ўзларининг самимий табриклари ва эзгу тилакларини йўллаган хорижий давлатлар, ҳукумат ва парламентлар раҳбарлари, сиёсат ва жамоат арбоблари, ишбилармон доиралар вакилларига, халқаро ташкилотлар етакчиларига, юртимиздаги маҳаллалар аҳли ва меҳнат жамоаларига, барча ватандошларимга чуқур миннатдорлик изҳор этаман”, — деди давлат раҳбари.
Шавкат Мирзиёевнинг таъкидлашича, ушбу табрик ва тилакларни энг аввало Ўзбекистон халқи ва давлатига юксак ҳурмат ва эҳтиром, мамлакатда амалга оширилаётган ислоҳотларга ва Ўзбекистон ёруғ келажагига бўлган ишонч ифодаси сифатида қабул қилади.
“Фурсатдан фойдаланиб, меҳнаткаш, бағрикенг ва олижаноб халқимизга яна бир бор чин юракдан ўзимнинг чексиз фарзандлик меҳрим ва ҳурматимни билдираман.
Ишончим комил, эл-юртимизнинг фидокорона меҳнати, улкан бунёдкорлик салоҳияти ва ҳамжиҳатлиги билан Янги Ўзбекистонни барпо этиш бўйича ўз олдимизга қўйган буюк мақсадларга албатта етамиз”, — дея қўшимча қилган президент.
Шавкат Мирзиёев 24 июль куни 67 ёшга тўлди. Ўзбекистон етакчисига хорижий давлатлар, ҳукуматлар ва парламентлар, нуфузли халқаро ва минтақавий ташкилотлар раҳбарларидан қутловлар келган. Мактубларда Шавкат Мирзиёев раҳбарлигида Ўзбекистон давлатчиликни мустаҳкамлаш, халқ фаровонлигини юксалтириш ва мамлакатнинг халқаро майдондаги нуфузини ошириш йўлида улкан ютуқларга эришаётгани таъкидланган.
Шунингдек, президентга мустаҳкам соғлик, узоқ умр ва муваффақиятлар, Ўзбекистон халқига эса тинчлик-осойишталик ва фаровонлик тилаклари, ўзаро манфаатли ҳамкорликни янада мустаҳкамлашга қатъий интилиш билдирилган.
Изоҳ (0)