Shavkat Mirziyoyev 24-iyul kuni 67 yoshni qarshi olgandi. Prezident shu munosabat bilan tabriklagan barchaga minnatdorlik bildirdi.
“Tavallud kunim munosabati bilan chin dildan qutlab, o‘zlarining samimiy tabriklari va ezgu tilaklarini yo‘llagan xorijiy davlatlar, hukumat va parlamentlar rahbarlari, siyosat va jamoat arboblari, ishbilarmon doiralar vakillariga, xalqaro tashkilotlar yetakchilariga, yurtimizdagi mahallalar ahli va mehnat jamoalariga, barcha vatandoshlarimga chuqur minnatdorlik izhor etaman”, — dedi davlat rahbari.
Shavkat Mirziyoyevning ta’kidlashicha, ushbu tabrik va tilaklarni eng avvalo O‘zbekiston xalqi va davlatiga yuksak hurmat va ehtirom, mamlakatda amalga oshirilayotgan islohotlarga va O‘zbekiston yorug‘ kelajagiga bo‘lgan ishonch ifodasi sifatida qabul qiladi.
“Fursatdan foydalanib, mehnatkash, bag‘rikeng va olijanob xalqimizga yana bir bor chin yurakdan o‘zimning cheksiz farzandlik mehrim va hurmatimni bildiraman.
Ishonchim komil, el-yurtimizning fidokorona mehnati, ulkan bunyodkorlik salohiyati va hamjihatligi bilan Yangi O‘zbekistonni barpo etish bo‘yicha o‘z oldimizga qo‘ygan buyuk maqsadlarga albatta yetamiz”, — deya qo‘shimcha qilgan prezident.
Shavkat Mirziyoyev 24-iyul kuni 67 yoshga to‘ldi. O‘zbekiston yetakchisiga xorijiy davlatlar, hukumatlar va parlamentlar, nufuzli xalqaro va mintaqaviy tashkilotlar rahbarlaridan qutlovlar kelgan. Maktublarda Shavkat Mirziyoyev rahbarligida O‘zbekiston davlatchilikni mustahkamlash, xalq farovonligini yuksaltirish va mamlakatning xalqaro maydondagi nufuzini oshirish yo‘lida ulkan yutuqlarga erishayotgani ta’kidlangan.
Shuningdek, prezidentga mustahkam sog‘lik, uzoq umr va muvaffaqiyatlar, O‘zbekiston xalqiga esa tinchlik-osoyishtalik va farovonlik tilaklari, o‘zaro manfaatli hamkorlikni yanada mustahkamlashga qat’iy intilish bildirilgan.
Izoh (0)