Ўзбекистонда жамоатчилик фикри асосида ишлаб чиқилган “Менинг боғим” лойиҳаси ғолиблари эълон қилинди.
2024 йил 23 июндан 7 июлга қадар давом этган жараёнда Ўзбекистон бўйлаб “Очиқ бюджет” портали орқали 53 мингтадан ортиқ овоз берилди. Иқтисодиёт ва молия вазирлиги матбуот хизматининг хабар қилишича, овоз бериш жараёни якунларига кўра, 215 та лойиҳа ғолиб деб топилди.
Ғолиб бўлган лойиҳаларни молиялаштириш учун республика бўйича 48,6 миллиард сўм маблағ йўналтирилади. Ғолиб деб топилган лойиҳалар билан қуйидаги ҳавола орқали танишиш мумкин.
Президентнинг 2023 йил 23 ноябрдаги фармонида бюджетдан ҳар йили ажратиладиган маблағларнинг камида 50 фоизи “яшил боғлар” ва “яшил жамоат парклари”ни ташкил қилиш учун “Очиқ бюджет” ахборот портали орқали жамоатчилик фикри асосида шаклланган “Менинг боғим” лойиҳаларини молиялаштиришга йўналтирилиши белгиланганди.
Март ойида Шавкат Мирзиёев видеоселектор йиғилишида Экология вазирлигига “Менинг боғим” лойиҳасини ишга туширишни топширганди.
“Менинг боғим” лойиҳаларини шакллантириш ва молиялаштириш тартиби тўғрисидаги низомга кўра, Экология вазирлиги “Яшил макон” умуммиллий лойиҳаси учун бюджетдан ажратилган маблағларнинг камида 50 фоизини “Менинг боғим” лойиҳалари доирасида “яшил боғ” ва “яшил жамоат парклари”ни ташкил этишни молиялаштириш учун туманларга (шаҳарларга) тенг тақсимлаган ҳолда вазирлик ҳудудий бўлинмаларининг махсус шахсий ғазна ҳисобварақларига ўтказади.
Изоҳ (0)