Shavkat Mirziyoyev raisligida o‘tkazilayotgan videoselektor yig‘ilishida bahor mavsumida mahallalarda va ko‘p qavatli uylar atrofida, yo‘llar va kanallar bo‘yidagi yerlarga daraxt ekish chora-tadbirlari belgilab olindi. Bu haqda prezident matbuot kotibi xabar berdi.
Poytaxtda amal qilayotgan yirik qurilish loyihalarida maydonning kamida 30 foiziga daraxt ekish majburiyati barcha viloyatlarda joriy qilinishi belgilandi.
Ekologiya vazirligiga “Mening bog‘im” loyihasini ishga tushirish topshirildi. Bunga byudjetda nazarda tutilgan 50 milliard so‘m ajratiladi. Joylarda 444 ta yashil bog‘ va 160 ta jamoat parklarini tashkil qilishga ko‘rsatma berildi.
Oldinroq Toshkent viloyatida daraxt ekish bo‘yicha boshlangan loyihaga ko‘ra, Nurafshon, Bekobod shahri, O‘rta Chirchiq, Toshkent va Ohangaron tumanlari hududidan 34 gektar yer 30 yil muddatga obodonlashtirish boshqarmalariga berilishi xabar qilingandi. Har 1 gektar uchun mahalliy byudjetdan 100 million so‘m ajratilib, tomchilatib sug‘orish tizimi joriy qilinadi.
Izoh (0)