Ўзбекистон мактабларида чет тили ўқитувчилари камида B2 сертификатига эга бўлиши лозимлиги тўғрисидаги талаб енгиллаштирилади. Бу ҳақда Мактабгача ва мактаб таълими вазирлиги бошқарма бошлиғи Эркин Муродов “Дарё”га берган интервьюсида маълум қилди.
Ҳукумат қарори билан 2024/2025-ўқув йилигача мактаб, ўрта махсус ва профессионал таълим муассасаларининг хорижий тиллар ўқитувчилари камида B2 даражадаги сертификатга эга бўлиши лозимлиги белгиланган. Эркин Муродов қарор ижроси қай даражада бажарилаётгани ҳақидаги саволга мазкур талабни енгиллаштириш кўзда тутилаётганини айтди.
“Ҳукумат қарори бўйича янги ўқув йилидан бошлаб B2 сертификати бўлмаган ўқитувчи мактабда инглиз тилидан дарс бера олмаслиги керак эди. Лекин бу талаб енгиллаштирилади. Ҳали расмий қарор чиқмагани учун тафсилотларни тўлиқ айта олмайман. Аслида бундай талаб қўйилишига сабаб сифатли таълимга эришиш учун сифатли ўқитувчи кераклиги билан боғлиқ. Хорижий тилда дарс берувчи ўқитувчи чет тилини энг камида B2 — олий таълимни битирганда бакалаврга қўйилган даражада билиши керак. Бу хорижий тилларни ўргатишда сифатга эришиш учун қўйилган талаб ва мақсадлардан ҳисобланади”, деди мутахассис.
Таҳлилларга кўра, ҳозирда сертификат олишга улгурмаган ўқитувчиларга яна қўшимча муддат берилиши мумкин. Яъни, инглиз тили ўқитувчилари 3 йил давомида ҳам зарур сертификат олмаган бўлса, бу сафар ҳам имкон берилиш эҳтимоли бор.
Изоҳ (0)