Тошкент вилоятида майнинг ферма ташкил қилганлар давлатга 1,2 млрд сўмдан зиёд зарар етказди

Тошкент вилоятида майнинг ферма ташкил этган хонадонлар аниқланди, деб хабар бермоқда Бош прокуратура ҳузуридаги департамент. 

Унга кўра, департаментнинг Қибрай туман бўлими ва ДХХ ходимлари ҳамкорлигида тезкор тадбир ўтказилган. “Гулистон” МФЙ ҳудудидаги хонадонда яшовчи  Қ.Т. ўз уйида 8 та тўпламдаги майнинг қурилмаларини тижорат мақсадида умумий фойдаланишдаги электр тармоғига улаб, қонунга хилоф равишда майнинг фаолияти билан шуғулланиб келиб, давлат ва жамият манфаатларига 1,2 млрд сўм зарар етказгани аниқланган.

Шу каби, департаментнинг Юқори Чирчиқ туман бўлими,  ДХХ ва ИИББ ходимлари ҳамкорлигида ўтказилган тезкор тадбирда фуқаро Ж.Ш. “Султонравот” МФЙ ҳудудидаги турар жой биносида “Аrt Miner S9” русумли майнинг қурилмасини ўрнатиб, қонунга хилоф равишда майнинг фаолияти билан шуғулланиб келиб, давлат ва жамият манфаатларига 50,7 млн сўм зарар етказгани аниқланган.   

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.